മുഹമ്മദ് കൈഫിന്റെ ഒറ്റയാൾ പോരാട്ടമാണ് ആലപ്പിയെ വിജയത്തിലേക്ക് നയിച്ചത്. 30 പന്തിൽ നിന്ന് 66 റൺസാണ് കൈഫ് അടിച്ചെടുത്തത്.
തിരുവവനന്തപുരം: കേരള ക്രിക്കറ്റ് ലീഗിൽ ആലപ്പി റിപ്പിൾസിനെ വിജയത്തിലേക്ക് നയിച്ചത് മുഹമ്മദ് കൈഫിന്റെ ഒറ്റയാൾ പ്രകടനം. ട്രിവാൻഡ്രം റോയൽസ് ഉയർത്തിയ 178 റൺസ് വിജയലക്ഷ്യം പിന്തുടർന്നിറങ്ങിയ ആലപ്പിക്ക് കാര്യങ്ങൾ എളുപ്പമായിരുന്നില്ല. മുൻനിര ബാറ്റർമാർക്ക് കാര്യമായ സംഭാവനകൾ നൽകാൻ സാധിക്കാതെ വന്നപ്പോൾ ഒറ്റയാൾ പോരാട്ടവുമായി മുഹമ്മദ് കൈഫ് ക്രീസിൽ ഉറച്ചുനിന്നു. 30 പന്തുകൾ നേരിട്ട കൈഫ്, ഒരു ഫോറും ഏഴ് കൂറ്റൻ സിക്സറുകളുമടക്കം 66 റൺസാണ് അടിച്ചുകൂട്ടിയത്. കൈഫിന്റെ ഈ വെടിക്കെട്ട് പ്രകടനം ആലപ്പി റിപ്പിൾസിനെ വിജയത്തിലെത്തിക്കുന്നതിൽ നിർണായക പങ്ക് വഹിച്ചു.
ഇംപാക്ട് പ്ലേയറായിരുന്ന കൈഫ് 12ആം ഓവറിലായിരുന്നു ബാറ്റ് ചെയ്യാനെത്തിയത്. അഞ്ച് വിക്കറ്റിന് 85 റൺസെന്ന നിലയിലായിരുന്നു റിപ്പിൾസ് അപ്പോൾ. ജയിക്കാൻ വേണ്ടത് 50 പന്തുകളിൽ 94 റൺസ്. എന്നാൽ സമ്മർദ്ദങ്ങളില്ലാതെ സിക്സുകളിലൂടെ കൈഫ് സ്കോറുയർത്തി. ആറാം വിക്കറ്റിൽ അക്ഷയ് ടി കെയുമായി ചേർന്ന് കൈഫ് 72 റൺസാണ് കൂട്ടിച്ചേർത്തത്. പ്ലേയിംഗ് ഇലവനിൽ ഇല്ലാതിരുന്ന കൈഫ്, രാഹുൽ ചന്ദ്രന് പകരക്കാരനായി ഇറങ്ങിയാണ് ടീമിന്റെ രക്ഷകനായത്.
മത്സരത്തില് ആദ്യം ബാറ്റ് ചെയ്ത ട്രിവാന്ഡ്രം റോയല്സ് 20 ഓവറില് അഞ്ച് വിക്കറ്റ് നഷ്ടത്തിലാണ് 178 റണ്സടിച്ചത്. അര്ധസെഞ്ചുറി നേടിയ ക്യാപ്റ്റൻ കൃഷ്ണ പ്രസാദിന്റെയും(53 പന്തില് 67), അബ്ദുള് ബാസിത്(22 പന്തില് 31), നിഖില്(31 പന്തില് 41) എന്നിവരുടെ ബാറ്റിംഗ് മികവിലാണ് ട്രിവാന്ഡ്രം ഭേദപ്പെട്ട സ്കോര് ഉയര്ത്തിയത്. മറുപടി ബാറ്റിംഗില് കൈഫിന് പുറമെ ക്യാപ്റ്റന് മുഹമ്മദ് അസറുദ്ദീന്(22 പന്തില് 38), ജലജ് സക്സേന(10 പന്തില് 17), അരുണ്(19), അക്ഷയ് ടികെ(24) എന്നിവരും ഭേദപ്പെട്ട പ്രകടനം നടത്തി.
