ഇന്ത്യയുടെ ഒന്നാം ഇന്നിംഗ്സ് സ്കോറായ 223നെതിരെ രണ്ടാം ദിനം ബാറ്റിംഗ് ആരംഭിച്ച ആതിഥേയര് ലഞ്ചിന് പിരിയുമ്പോള് മൂന്നിന് 100 എന്ന നിലയിലാണ്. റാസി വാന് ഡര് ഡസ്സന് (17), കീഗന് പീറ്റേഴ്സണ് (40) എന്നിവരാണ് ക്രീസില്.
കേപ്ടൗണ്: ഇന്ത്യക്കെതിരായ (SAvIND) മൂന്നാം ടെസറ്റിന്റെ ഒന്നാം ഇന്നിംഗ്സില് ദക്ഷിണാഫ്രിക്ക (South Africa) പൊരുതുന്നു. ഇന്ത്യയുടെ ഒന്നാം ഇന്നിംഗ്സ് സ്കോറായ 223നെതിരെ രണ്ടാം ദിനം ബാറ്റിംഗ് ആരംഭിച്ച ആതിഥേയര് ലഞ്ചിന് പിരിയുമ്പോള് മൂന്നിന് 100 എന്ന നിലയിലാണ്. റാസി വാന് ഡര് ഡസ്സന് (17), കീഗന് പീറ്റേഴ്സണ് (40) എന്നിവരാണ് ക്രീസില്. ജസ്പ്രിത് ബുമ്ര (Jasprit Bumrah) ഇന്ത്യക്കായി രണ്ട് വിക്കറ്റ് വീഴ്ത്തി. ഇപ്പോള് 123 റണ്സ് പിറകിലാണ് ദക്ഷിണാഫ്രിക്ക.
ഒന്നിന് 17 എന്ന നിലയിലാണ് ദക്ഷിണാഫ്രിക്ക രണ്ടാം ദിവസം ആരംഭിച്ചത്. എയ്ഡന് മാര്ക്രമിനെയാണ് (8) ഇന്ന് ആദ്യം നഷ്ടമായത്. തലേ ദിവസത്തെ സ്കോറിന് ഒരു റണ് പോലും കൂട്ടിച്ചേര്ക്കാനാവാതെ താരം ബുമ്രയുടെ പന്തില് വിക്കറ്റ് തെറിച്ച് മടങ്ങി. നൈറ്റ്വാച്ച്മാനായി ക്രിസീലുണ്ടായിരുന്ന കേശവ് മഹാരാജ് (25) തന്നെ ഏല്പ്പിച്ച ജോലി ഭംഗിയായി പൂര്ത്തിയാക്കി മടങ്ങി. ഉമേഷ് യാദവിന്റെ പന്തില് ബൗള്ഡാവുകയായിരുന്നു താരം. ക്യാപ്റ്റന് ഡീന് എല്ഗാറിനെ (3) ഇന്നലെ തന്നെ ബുമ്ര മടക്കിയയച്ചിരുന്നു.
നേരത്തെ, ക്യാപ്റ്റന് വിരാട് കോലിയുടെ 79 റണ്സാണ് ഇന്ത്യയെ മാന്യമായ സ്കോറിലേക്ക് നയിച്ചത്. നാല് വിക്കറ്റ് വീഴ്ത്തിയ കഗിസോ റബാദ സന്ദര്ശകരുടെ തകര്ച്ചയില് പ്രധാന പങ്കാളിയായി. മാര്കോ ജാന്സണ് മൂന്ന് വിക്കറ്റ് വീഴ്ത്തി. ചേതേശ്വര് പൂജാരയാണ് (43) ഇന്ത്യന് നിരയിലെ മറ്റൊരു പ്രധാന സ്കോറര്. കെ എല് രാഹുല് (12), മായങ്ക് അഗര്വാള് (15), അജിന്ക്യ രഹാനെ (9), റിഷഭ് പന്ത് (27), ആര് അശ്വിന് (2), ഷാര്ദുല് ഠാക്കൂര് (12) എന്നിവര് നിരാശപ്പെടുത്തി. ജസ്പ്രിത് ബുമ്ര (0), മുഹമ്മദ് ഷമി (0) എന്നിവരാണ് പുറത്തായ മറ്റുതാരങ്ങള്.
നേരത്തെ, രണ്ട് മാറ്റവുമായിട്ടാണ് ഇന്ത്യ ഇറങ്ങിയത്. കോലി പരിക്ക് മാറി തിരിച്ചെത്തിയപ്പോള് ഹനുമ വിഹാരിക്ക് പുറത്തേക്കുള്ള വഴി തെളിഞ്ഞു. രണ്ടാം ടെസ്റ്റിനിടെ പരിക്കേറ്റിരുന്ന മുഹമ്മദ് സിറാജിനും കളത്തിലിറങ്ങാനായില്ല. ഉമേഷ് യാദവാണ് ടീമിലെത്തിയത്. മൂന്ന് മത്സരങ്ങളുടെ പരമ്പരയില് ഇരുവരും ഓരോ ടെസ്റ്റുകള് വീതം ജയിച്ചിരുന്നു. കേപ്ടൗണില് ജയിക്കുന്നവര്ക്ക് പരമ്പര സ്വന്തമാക്കാം.
ടീം ഇന്ത്യ: കെ എല് രാഹുല്, മായങ്ക് അഗര്വാള്, ചേതേശ്വര് പൂജാര, വിരാട് കോലി, അജിന്ക്യ രഹാനെ, റിഷഭ് പന്ത്, ആര് അശ്വിന്, ഷാര്ദുല് ഠാക്കൂര്, മുഹമ്മദ് ഷമി, ജസ്പ്രിത് ബുമ്ര, ഉമേഷ് യാദവ്.
ദക്ഷിണാഫ്രിക്ക: ഡീന് എല്ഗാര്, എയ്ഡന് മാര്ക്രം, കീഗന് പീറ്റേഴ്സണ്, റാസി വാന് ഡെര് ഡസ്സന്, തെംബ ബവൂമ, കെയ്ല് വെറൈയ്നെ, മാര്കോ ജാന്സണ്, കഗിസോ റബാദ,കേശവ് മഹാരാജ്, ഡുവാനെ ഒലിവര്, ലുങ്കി എന്ഗിഡി.
