ലാവ ബ്ലേസ് ഡ്യുവോ 3യിലെ രണ്ടാം റിയര് ഡിസ്പ്ലെ വഴി നോട്ടിഫിക്കേഷനുകള് അറിയാനും പാട്ടുകള് പ്ലേ ചെയ്യാനും റിയര് ക്യാമറ ഉപയോഗിച്ച് സെല്ഫികളെടുക്കാനും ചില ആപ്പുകളെങ്കിലും പ്രവര്ത്തിപ്പിക്കാനും കഴിയുമെന്നാണ് സൂചന
ദില്ലി: ലാവ ഇന്ത്യന് വിപണിക്കായി പുതിയ അഫോര്ഡബിള് സ്മാര്ട്ട്ഫോണ് പുറത്തിറക്കുന്നു. ലാവ ബ്ലേസ് ഡ്യുവോ 3 (Lava Blaze Duo 3) എന്നാണ് ഈ ഫോണിന്റെ പേര്. ഇ-കൊമേഴ്സ് പ്ലാറ്റ്ഫോമായ ആമസോണില് ലാവ ബ്ലേസ് ഡ്യുവോ 3 ഫോണിന്റെ ഡിസൈന് കമ്പനി പുറത്തുവിട്ടു. ജനുവരി 19-ാം തീയതിയാണ് ലാവ ബ്ലേസ് ഡ്യുവോ 3 ലോഞ്ച് ചെയ്യുക.
ലാവ ബ്ലേസ് ഡ്യുവോ 3 സവിശേഷതകള്
ഇന്ത്യന് സ്മാര്ട്ട്ഫോണ് ബ്രാന്ഡാണ് ലാവ. അവരുടെ ഏറ്റവും പുതിയ സ്മാര്ട്ട്ഫോണ് മോഡലായ ലാവ ബ്ലേസ് ഡ്യുവോ 3 ജനുവരി 19ന് ഇന്ത്യന് വിപണിയില് അവതരിപ്പിക്കപ്പെടും. ഫ്ലാറ്റ് പാനലാണ് ഫോണിന്റെ പിന്വശത്തിന് നല്കിയിരിക്കുന്നത്. ക്യാമറ മൊഡ്യൂളിനോട് ചേര്ന്ന് മറ്റൊരു റിയര് പാനല് കൂടിയുണ്ട്. ഇതില് ക്ലോക്കിന് സമാനമായ ഡിസൈന് നല്കിയിരിക്കുന്നതായി ലാവ ബ്ലേസ് ഡ്യുവോ 3യുടെ ടീസറില് കാണാം. ഈ രണ്ടാം റിയര് ഡിസ്പ്ലെ വഴി നോട്ടിഫിക്കേഷനുകള് അറിയാനും പാട്ടുകള് പ്ലേ ചെയ്യാനും റിയര് ക്യാമറ ഉപയോഗിച്ച് സെല്ഫികളെടുക്കാനും ചില ആപ്പുകളെങ്കിലും പ്രവര്ത്തിപ്പിക്കാനും കഴിയുമെന്നാണ് സൂചന. ഇരട്ട ക്യാമറ സംവിധാനവും ഫോണിലുണ്ടാകും. ഇതിലൊരു ക്യാമറയെങ്കിലും 50-മെഗാപിക്സലിന്റെതായിരിക്കും എന്നാണ് റിപ്പോര്ട്ട്. വെര്ട്ടിക്കലായാണ് ക്യാമറ ലെന്സുകള് ക്രമീകരിച്ചിരിക്കുന്നത്. 8എംപിയുടേതാണ് സെല്ഫി ക്യാമറ
ലാവ ബ്ലേസ് ഡ്യുവോ 3: ചിപ്പ് അടക്കമുള്ള വിവരങ്ങള്
ആന്ഡ്രോയ്ഡ് 15 അടിസ്ഥാനത്തില് തയ്യാറാക്കിയിരിക്കുന്നത് എന്ന് കരുതുന്ന ലാവ ബ്ലേസ് ഡ്യുവോ 3യില് 6.6 ഇഞ്ച് ഫുള് എച്ച്ഡി+ അമോലെഡ് ഡിസ്പ്ലെയാണുണ്ടാവുക. 1,000 നിറ്റ്സ് പീക്ക് ബ്രൈറ്റ്നസാണ് ഈ സ്ക്രീനിന് പ്രതീക്ഷിക്കുന്നത്. 1.6 ഇഞ്ചാണ് സെക്കന്ഡറി റിയര് സ്ക്രീനിന്റെ വലിപ്പം. മീഡിയടെക് ഡൈമന്സിറ്റി 7060 ചിപ്സെറ്റില് 6 ജിബി റാമും 128 ജിബി യുഎഫ്സ് 3.1 സ്റ്റോറേജുമായി സംയോജിപ്പിച്ചാണ് ലാവ ബ്ലേസ് ഡ്യുവോ 3 തയ്യാറാക്കിയിരിക്കുന്നത്. 33 വാട്സ് ഫാസ്റ്റ് ചാര്ജിംഗ് പിന്തുണയുള്ള 5,000 എംഎഎച്ച് ബാറ്ററിയാണ് ഈ ഫോണിനുള്ളത്. 5ജി, ബ്ലൂടൂത്ത് 5.2. ജിപിഎസ്, ഗ്ലോനാസ്, ഗലീലിയോ തുടങ്ങിയ കണക്റ്റിവിറ്റി സൗകര്യങ്ങളുള്ള ലാവ ബ്ലേസ് ഡ്യുവോ 3 ഫോണിന്റെ കട്ടി 7.55 എംഎം ആണ്. ഐപി64 റേറ്റിംഗാണ് ഫോണിന് ലഭിച്ചിരിക്കുന്നത്.
Related Articles
