- Home
- Sports
- Cricket
- 'ലോകകപ്പിലെ നിര്ണായക മത്സരങ്ങളിലും അത് സംഭവിക്കാം', തോല്വിക്ക് പിന്നാലെ ഇന്ത്യക്ക് മുന്നറിയിപ്പുമായി അജിങ്ക്യാ രഹാനെ
'ലോകകപ്പിലെ നിര്ണായക മത്സരങ്ങളിലും അത് സംഭവിക്കാം', തോല്വിക്ക് പിന്നാലെ ഇന്ത്യക്ക് മുന്നറിയിപ്പുമായി അജിങ്ക്യാ രഹാനെ
ന്യൂസിലൻഡിനെതിരായ നാലാം ടി20യിൽ അഭിഷേക് ശർമ ആദ്യ പന്തിൽ പുറത്തായെങ്കിലും, താരത്തിന്റെ ആക്രമണോത്സുക ബാറ്റിംഗ് ശൈലിയെ പിന്തുണച്ച് മുൻ ഇന്ത്യൻ താരം അജിങ്ക്യ രഹാനെ.
അഭിഷേകിന് അഭിനന്ദനം
വിശാഖപട്ടണത്ത് നടന്ന ന്യൂസിലൻഡിനെതിരെയുള്ള നാലാം ടി20യിൽ ഇന്ത്യ പരാജയപ്പെട്ടെങ്കിലും, ഓപ്പണർ അഭിഷേക് ശർമയുടെ ആക്രമണോത്സുക ബാറ്റിംഗ് ശൈലിയെ പിന്തുണച്ച് മുൻ ഇന്ത്യൻ താരം അജിങ്ക്യ രഹാനെ. 216 റൺസ് പിന്തുടരുന്നതിനിടെ നേരിട്ട ആദ്യ പന്തിൽ തന്നെ പുറത്തായ അഭിഷേകിന്റെ 'ഹൈ-റിസ്ക്' ഗെയിമിനെ വിമർശിക്കേണ്ടതില്ലെന്നും ലോകകപ്പിനുള്ള മികച്ച തയ്യാറെടുപ്പാണിതെന്നും രഹാനെ പറഞ്ഞു.
ഹൈ-റിസ്ക് ഹൈ റിവാര്ഡ്
നാലാം ടി20യില് നേരിട്ട ആദ്യ പന്തിൽ തന്നെ പുറത്തായെങ്കിലും അഭിഷേക് ശർമയുടെ ബാറ്റിംഗ് രീതി ഇന്ത്യക്ക് ഗുണകരമാകുമെന്നാണ് രഹാനെയുടെ പക്ഷം. അഭിഷേക് കളിക്കുന്നത് വലിയ റിസ്ക് ഉള്ള ഗെയിമാണെന്നും, അത് വിജയിക്കുമ്പോൾ അദ്ദേഹം ഒറ്റയ്ക്ക് കളി ജയിപ്പിക്കുമെന്നും രഹാനെ പറഞ്ഞു.
ലോകകപ്പിലും അത് സംഭവിക്കാം
അഭിഷേകിന്റെ കാര്യത്തിൽ ഇത് സംഭവിക്കാവുന്നതാണ്. ചിലപ്പോൾ ആദ്യ പന്തിൽ തന്നെ പൂജ്യത്തിന് പുറത്തായേക്കാം. ലോകകപ്പിലെ നിര്ണായക മത്സരങ്ങളിലും ഇത് സംഭവിക്കാം. പക്ഷേ അത് നേരിടാൻ ടീം സജ്ജമാകണമെന്നും രഹാനെ മുന്നറിയിപ്പ് നല്കി.
ലോകകപ്പിന് മുൻപുള്ള മുന്നറിയിപ്പ്
ഫെബ്രുവരി 7-ന് ടി20 ലോകകപ്പ് ആരംഭിക്കാനിരിക്കെ, ഓപ്പണർമാർ പരാജയപ്പെട്ടാൽ മധ്യനിര എങ്ങനെ പ്രതികരിക്കണം എന്നതിന് തെളിവാണ് വിശാഖപട്ടണത്തെ മത്സരമെന്നും രഹാനെ ഓർമ്മിപ്പിച്ചു. ഇന്ത്യ ഒരു താരത്തെ മാത്രം ആശ്രയിക്കുന്ന ടീമല്ലെന്നും ഏഴ് ബാറ്റർമാരുമായി ഇറങ്ങുന്നത് ബാറ്റിംഗ് കരുത്ത് വർദ്ധിപ്പിക്കുമെന്നും രഹാനെ പറഞ്ഞു.
അവിശ്വസനീയ പ്രഹരശേഷി
വിശാഖപട്ടണത്ത് ഗോള്ഡന് ഡക്കായെങ്കിലും നാല് മത്സരങ്ങളിൽ നിന്നായി 152 റൺസാണ് അഭിഷേക് ഇതുവരെ ന്യൂസിലന്ഡിനെതിരായ ടി20 പരമ്പരയില് അടിച്ചുകൂട്ടിയത്. നിലവിൽ പരമ്പരയിൽ ഏറ്റവും കൂടുതൽ റൺസ് നേടിയ മൂന്നാമത്തെ ബാറ്ററാണ് അഭിഷേക്. 266.66 എന്ന അവിശ്വസനീയമായ സ്ട്രൈക്ക് റേറ്റിലാണ് താരം ബാറ്റ് വീശിയത്.നാല് ഇന്നിംഗ്സുകളിൽ നിന്ന് 50.66 ആണ് അഭിഷേകിന്റെ ബാറ്റിംഗ് ശരാശരി.
റായ്പൂരിലെ റെക്കോര്ഡ്
റായ്പൂരിൽ നടന്ന മത്സരത്തിൽ വെറും 14 പന്തിൽ നിന്ന് അർദ്ധ സെഞ്ച്വറി തികച്ച അഭിഷേക്, ഒരു ഇന്ത്യൻ താരത്തിന്റെ രണ്ടാമത്തെ അതിവേഗ ടി20 ഫിഫ്റ്റി എന്ന റെക്കോർഡും സ്വന്തമാക്കിയിരുന്നു. ആദ്യ ആറോവറിനുള്ളിൽ തന്നെ മത്സരത്തിന്റെ ഗതി മാറ്റാൻ തനിക്ക് സാധിക്കുമെന്ന് ആ ഇന്നിംഗ്സിലൂടെ അഭിഷേക് തെളിയിച്ചു.
ഒടുവില് കിവീസിന് ആശ്വാസം
ടി20 പരമ്പരയിലെ നാലാം മത്സരത്തില് ഇന്ത്യയെ 50 റണ്സിന് തകര്ത്താണ് ന്യൂസിലന്ഡ് ആശ്വാസ ജയം നേടിയത്. 216 റണ്സ് വിജയലക്ഷ്യം പിന്തുടർന്ന ഇന്ത്യ 18.4 ഓവറില് 165 റണ്സിന് ഓള് ഔട്ടായി. 23 പന്തില് 65 റണ്സെടുത്ത ശിവം ദുബെയാണ് ഇന്ത്യയുടെ ടോപ് സ്കോറര്. റിങ്കു സിംഗ് 30 പന്തില് 39 റണ്സെടുത്തപ്പോള് സഞ്ജു സാംസണ് 15 പന്തില് 24 റണ്സെടുത്ത് പുറത്തായി.
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!
