- Home
- Sports
- Cricket
- സഞ്ജു മുതൽ തിലക് വരെ 'സൂപ്പര് ഹിറ്റ്'; ചെപ്പോക്കിൽ ഇന്ത്യയുടെ റെക്കോർഡ് വേട്ട, യുവി യുഗത്തിലെ റെക്കോർഡും വീണു
സഞ്ജു മുതൽ തിലക് വരെ 'സൂപ്പര് ഹിറ്റ്'; ചെപ്പോക്കിൽ ഇന്ത്യയുടെ റെക്കോർഡ് വേട്ട, യുവി യുഗത്തിലെ റെക്കോർഡും വീണു
ടി20 ലോകകപ്പില് സിംബാബ്വെയ്ക്കെതിരെ നടന്ന മത്സരത്തില് റൺമല തീർത്ത് റെക്കോര്ഡുകള് വാരിക്കൂട്ടി ടീം ഇന്ത്യ. 20 ഓവറിൽ 256 റൺസ് നേടിയ ഇന്ത്യ, ടി20 ലോകകപ്പ് ചരിത്രത്തിലെ തങ്ങളുടെ ഏറ്റവും ഉയർന്ന സ്കോർ ഉൾപ്പെടെ നിരവധി റെക്കോർഡുകൾ സ്വന്തമാക്കി.
ചെപ്പോക്കില് റണ്മല
ടി20 ലോകകപ്പിലെ ജീവന്മരണപ്പോരില് സിംബാബ്വെക്കെതിരെ റണ്മല ഉയര്ത്തി ലോകകപ്പില് പുതിയ റെക്കോര്ഡിട്ട് ഇന്ത്യൻ ടീം. സിംബാബ്വെക്കതിരായ സൂപ്പര് 8 പോരില് ടോസ് നഷ്ടമായി ആദ്യം ബാറ്റ് ചെയ്ത ഇന്ത്യ 20 ഓവറില് നാലു വിക്കറ്റ് നഷ്ടത്തില് 256 റണ്സെടുത്തു.
റെക്കോര്ഡിട്ട് ഇന്ത്യ
ടി20 ലോകകപ്പ് ചരിത്രത്തിലെ ഇന്ത്യയുടെ ഏറ്റവും ഉയര്ന്ന ടീം ടോട്ടലാണിത്. 2007ലെ ആദ്യ ലോകകപ്പില് സ്റ്റുവര്ട്ട് ബ്രോഡിനെതിരെ യുവരാജ് സിംഗ് ആറ് പന്തില് ആറ് സിക്സ് നേടിയ മത്സരത്തില് കുറിച്ച 218-4 എന്ന ഉയര്ന്ന ടീം ടോട്ടലാണ് ചെന്നൈയില് ഇന്ത്യ തിരുത്തിയെഴുതിയത്.
ലോകകപ്പിലെ ഉയര്ന്ന രണ്ടാമത്തെ സ്കോര്
ടി20 ലോകകപ്പ് ചരിത്രത്തിലെ ഏറ്റവും ഉയര്ന്ന രണ്ടാമത്തെ ടീം ടോട്ടലാണ് സിംബാബ്വെക്കെതിരെ ഇന്ത്യ ഇന്ന് കുറിച്ച 256-4. 2007ൽ നടന്ന ആദ്യ ലോകകപ്പിൽ കെനിയയ്ക്ക് എതിരെ ശ്രീലങ്ക നേടിയ 6ന് 260 റൺസാണ് ടി20 ലോകകപ്പില് ഒരു ടീം നേടിയ ഏറ്റവും ഉയര്ന്ന സ്കോറായി ഇന്നും നിലനിൽക്കുന്നത്.
മൂന്നാമത് വിന്ഡീസ്
ഈ ലോകകപ്പില് സൂപ്പര് 8 പോരാട്ടത്തില് സിംബാബ്വെക്കെതിരെ വെസ്റ്റ് ഇന്ഡീസ് നേടിയ 254-6 ടി20 ലോകകപ്പ് ചരിത്രത്തിലെ ഏറ്റവും ഉയര്ന്ന മൂന്നാമത്തെ ടീം ടോട്ടല്.
ഡോട്ട് ബോള് കണക്കിലും റെക്കോര്ഡ്
ഇന്ത്യൻ ഇന്നംഗ്സില് റണ്ണില്ലാത്ത പന്തുകള്(ഡോട്ട് ബോളുകള്) 26 മാത്രമായിരുന്നു. ടി20 ലോകകപ്പ് ചരിത്രത്തില് ഏറ്റവും കുറഞ്ഞ ഡോട്ട് ബോളുകള് പിറന്ന ഇന്നിംഗ്സിന്റെ റെക്കോര്ഡിനൊപ്പം ഇതോടെ ഇന്ത്യയെത്തി. 2016ല് ദക്ഷിണാഫ്രിക്കയും ഈ നേട്ടം സ്വന്തമാക്കിയിരുന്നു.
വന്നവരെല്ലാം സൂപ്പര് ഹിറ്റ്
ഇന്ത്യൻ ഇന്നിംഗ്സില് ബാറ്റ് ചെയ്തവരെല്ലാം 150 നു മുകളില് സ്ട്രൈക്ക് റേറ്റ് സ്വന്തമാക്കി. സഞ്ജു സാംസണ്(160), അഭിഷേക് ശര്മ(183.33), ഇഷാന് കിഷന്(158.33), സൂര്യകുമാര് യാദവ്(253.85), ഹാര്ദ്ദിക് പാണ്ഡ്യ(217.39), തിലക് വര്മ(275) എന്നിങ്ങനെയായിരുന്നു ഇന്ത്യൻ ബാറ്റിംഗ് നിരയുടെ പ്രഹരശേഷി. ടി20 ലോകകപ്പില് ഇതാദ്യമായാണ് ഒരു ടീമിന്റെ ആദ്യ ആറ് ബാറ്റര്മാരും 150ന് മുകളില് പ്രഹരശേഷിയില് ബാറ്റ് ചെയ്യുന്നത്.
സിക്സറിലും റെക്കോര്ഡ്
സിംബാബ്വെക്കെതിരെ 17 സിക്സുകളാണ് ഇന്ത്യ ഇന്ന് പറത്തിയത്. ടി20 ലോകകപ്പില് ഒരിന്നിംഗ്സില് ഏറ്റവും കൂടുതല് സിക്സെന്ന തങ്ങളുടെ തന്നെ റെക്കോര്ഡിനൊപ്പം ഇന്ത്യ ഇന്നെത്തി.
ടൂര്ണമെന്റ് സിക്സിലും റെക്കോര്ഡ്
ഇന്ത്യൻ ടീം ഏറ്റവും കൂടുതല് സിക്സുകള് പറത്തുന്ന ടി20 ലോകകപ്പെന്ന റെക്കോര്ഡും ഇത്തവണ സ്വന്തമാക്കി. ലോകകപ്പില് ഇതുവരെ 63 സിക്സുകളാണ് ഇന്ത്യ പറത്തിയത്. 2024ലെ ലോകകപ്പില് 61 സിക്സുകള് പറത്തിയതായിരുന്നു ഇന്ത്യയുടെ റെക്കോര്ഡ്. ഈ ലോകകപ്പില് ഏറ്റവും കൂടുതല് സിക്സ് അടിച്ച ടീം 66 സിക്സ് അടിച്ച വെസ്റ്റ് ഇന്ഡീസാണ്.
റെക്കോര്ഡിട്ട് തിലകുപം ഹാര്ദ്ദിക്കും
അവസാന 31 പന്തില് 84 റണ്സ് അടിച്ചുകൂട്ടിയ തിലക് വര്മയും ഹാര്ദ്ദിക് പാണ്ഡ്യയും ലോകകപ്പ് ചരിത്രത്തിലെ ഏറ്റവും പ്രഹരശേഷി(16.25) കൂടിയ രണ്ടാമത്തെ കൂട്ടുകെട്ടെന്ന റെക്കോര്ഡും സ്വന്തമാക്കി. 2007ലെ ആദ്യ ലോകകപ്പില് ജയസൂര്യ-ജയവര്ധനെ സഖ്യം 29 പന്തില് 87 റണ്സെടുത്തതാണ് പ്രഹരശേഷിയില്(18) മുന്നിലുള്ള കൂട്ടുകെട്ട്.
സിംബാബ്വെക്ക് നാണക്കേടിന്റെ റെക്കോര്ഡ്
ലോകകകപ്പില് തുടര്ച്ചയായ മത്സരങ്ങളില് 250 റണ്സിലധികം വഴങ്ങുന്ന ആദ്യ ടീമെന്ന നാണക്കേട് സിംബാബ്വെയുടെ പേരിലായി. തൊട്ടു മുന് മത്സരത്തില് വിന്ഡീസ് സിംബാബ്വെക്കതിരെ 254 റണ്സെടുത്തിരുന്നു.
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!
