പിറകോട്ടെടുത്ത കാർ ശരീരത്തിലൂടെ കയറിയിറങ്ങി പാർക്കിങ് ഏരിയയിൽ കിടന്നുറങ്ങുകയായിരുന്ന 57-കാരിക്ക് ദാരുണാന്ത്യം. ഗുരുഗ്രാമിൽ വീട്ടുജോലിക്കാരിയായ യുപി സ്വദേശി ഗുഡ്ഡിയാണ് മരിച്ചത്. ഗുരുഗ്രാമിലെ അൻസാൽ അരാലിയ ഹൗസിങ് സൊസൈറ്റിയിലെ പാർക്കിങ് ഏരിയയിലാണ് സംഭവം.
ഗുരുഗ്രാം: പിറകോട്ടെടുത്ത കാർ ശരീരത്തിലൂടെ കയറിയിറങ്ങി പാർക്കിങ് ഏരിയയിൽ കിടന്നുറങ്ങുകയായിരുന്ന 57-കാരിക്ക് ദാരുണാന്ത്യം. ഗുരുഗ്രാമിൽ വീട്ടുജോലിക്കാരിയായ യുപി സ്വദേശി ഗുഡ്ഡിയാണ് മരിച്ചത്. ഗുരുഗ്രാമിലെ അൻസാൽ അരാലിയ ഹൗസിങ് സൊസൈറ്റിയിലെ പാർക്കിങ് ഏരിയയിലാണ് സംഭവം.
ഹൗസിങ് സൊസൈറ്റിയിലെ ഫ്ളാറ്റുകളിൽ ജോലിചെയ്തുവന്നിരുന്ന ഗുഡ്ഡി സൊസൈറ്റിയിലെ പാർക്കിങ്ങിൽ ഉറങ്ങുന്നതിനിടെയാണ് സംഭവം. ഒരു സ്ത്രീ ഓടിച്ചിരുന്ന എസ് യു വിയാണ് അപകടമുണ്ടാക്കിയത്. സ്ത്രീ അശ്രദ്ധയോടെ വാഹനം പിറകോട്ടെടുത്തപ്പോൾ കിടന്നുറങ്ങുകയായിരുന്ന ഗുഡ്ഡിയുടെ ശരീരത്തിലൂടെ വാഹനം കയറിയിറങ്ങുകയായിരുന്നു. തുടർന്ന് വാഹനമോടിച്ചിരുന്ന സ്ത്രീ ഗുഡ്ഡിയെ മറ്റൊരു വാഹനത്തിൽ കയറ്റി ആശുപത്രിയിൽ കൊണ്ടുപോയെങ്കിലും മരണം സംഭവിച്ചിരുന്നു.
അതേസമയം, ആശുപത്രിയിൽവെച്ച് ഡോക്ടർമാർ മരണം സ്ഥിരീകരിച്ചതോടെ വാഹനമോടിച്ചിരുന്ന സ്ത്രീ മൃതദേഹവുമായി തിരികെ സൊസൈറ്റിയിലേക്ക് വന്നതായാണ് ആരോപണം. തുടർന്ന് മൃതദേഹം പാർക്കിങ്ങിൽ ഉപേക്ഷിച്ചെന്നും ഇതിനുശേഷം സ്ത്രീ സ്വന്തം ഫ്ളാറ്റിലേക്ക് മടങ്ങിയെന്നും പരാതിയുണ്ട്. തുടർന്ന് പൊലീസ് സ്ഥലത്തെത്തിയാണ് മൃതദേഹം പോസ്റ്റ്മോർട്ടത്തിനായി ആശുപത്രിയിലേക്ക് മാറ്റിയത്. സംഭവത്തിൽ വാഹനമോടിച്ചിരുന്ന സ്ത്രീയെ കസ്റ്റഡിയിലെടുത്തതായും വാഹനം പിടിച്ചെടുത്തതായും പൊലീസ് അറിയിച്ചു.
