ദില്ലിയിൽ സിഎൻജി സിലിണ്ടർ പൊട്ടിത്തെറിച്ച് അപകടം. തിക്രി കലാൻ മെട്രോ സ്റ്റേഷന് സമീപമുണ്ടായ സ്ഫോടനത്തിൽ ഒരാൾ മരിച്ചു. ആറുപേർക്ക് പരിക്കേറ്റു. ബുധനാഴ്ച ഉച്ചകഴിഞ്ഞാണ് സംഭവം.
ദില്ലി: ദില്ലിയിൽ പമ്പിൽ വെച്ച് സിഎൻജി നിറയ്ക്കുന്നതിനിടെ ട്രക്കിൻ്റെ സിലിണ്ടർ പൊട്ടിത്തെറിച്ച് ഒരു മരണം. ആറുപേർക്ക് പരിക്കേറ്റു. ഇവരുടെ നില ഗുരുതരമാണെന്ന് പൊലീസ് അറിയിച്ചു. അപകടസ്ഥലത്ത് പൊലീസ്, ഫയർ ഡിപ്പാർട്ട്മെൻ്റ് ഉദ്യോഗസ്ഥരെ വിന്യസിച്ചു.
ബുധനാഴ്ച തിക്രി കലാൻ മെട്രോ സ്റ്റേഷന് സമീപമാണ് സംഭവം. ഉച്ചകഴിഞ്ഞ് 3:37 ഓടെയാണ് ഫയർ ഡിപ്പാർട്ട്മെൻ്റിന് വിവരം ലഭിച്ചത്. ഉടൻതന്നെ ആറു അഗ്നിശമന വാഹനങ്ങൾ സ്ഥലത്തേക്ക് അയച്ചു. ട്രക്കിൻ്റെ സിലിണ്ടറിൽ ഇന്ധനം നിറയ്ക്കുകയായിരുന്ന ജീവനക്കാരനാണ് കൊല്ലപ്പെട്ടതെന്ന് ഔട്ടർ ദില്ലി ഡിസിപി അറിയിച്ചു. സംഭവസ്ഥലത്ത് ഉണ്ടായിരുന്ന ആളുകൾക്കാണ് പരിക്കേറ്റത്. ഇവരെ സമീപത്തുള്ള ആശുപത്രികളിൽ പ്രവേശിപ്പിച്ചിരിക്കുകയാണ്. അപകടത്തിൻ്റെ കാരണം വ്യക്തമല്ല.
