അമേരിക്കയിലെ ചിക്കാഗോയ്ക്ക് സമീപമുള്ള ഹിന്ദു ക്ഷേത്രത്തിൽ ഭീകരാക്രമണം നടത്താൻ പദ്ധതിയിട്ട 19-കാരനെ പൊലീസ് അറസ്റ്റ് ചെയ്തു. ഇയാളുടെ പക്കൽ നിന്ന് തോക്കുകളും വെളുത്ത വർഗക്കാരുടെ വംശീയ അധിനിവേശ ആശയങ്ങൾ പ്രകടിപ്പിക്കുന്ന ലഘുലേഖകളും കണ്ടെത്തി. ഇന്ത്യൻ വംശജർക്കെതിരെ ആക്രമണം നടത്താനായിരുന്നു പ്രതിയുടെ ലക്ഷ്യം.
ചിക്കാഗോ: അമേരിക്കയിലെ ചിക്കാഗോയ്ക്ക് സമീപമുള്ള ഹിന്ദു ആരാധനാലയത്തിന് നേരെ ഭീകരാക്രമണത്തിന് പദ്ധതിയിട്ട 19-കാരനെ പൊലീസ് അറസ്റ്റ് ചെയ്തു. ഇല്ലിനോയിയിലെ പാലറ്റൈൻ സ്വദേശി അലക്സാണ്ട്രോസ് പപോരാക്കിസ് ആണ് പൊലീസിന്റെ പിടിയിലായത്. ഇയാൾ അയച്ച സന്ദേശങ്ങളെക്കുറിച്ച് മൗണ്ട് പ്രോസ്പെക്ട് പൊലീസിന് ലഭിച്ച വിവരങ്ങളുടെ അടിസ്ഥാനത്തിൽ നടത്തിയ അന്വേഷണത്തിലാണ് ഞായറാഴ്ച വൈകുന്നേരം ഇയാളെ കസ്റ്റഡിയിലെടുത്തത്. തോക്കുമായി പ്രതി ക്ഷേത്രത്തിലെത്തിയെങ്കിലും ആയുധം തകരാറിലായതിനാൽ വെടിയുതിർക്കാനായില്ല എന്നാണ് പൊലീസ് പറയുന്നത്.
പ്രതിയുടെ വീട്ടിൽ നടത്തിയ പരിശോധനയിൽ തോക്കുകൾ, മരുന്നുകൾ നിറച്ച മാഗസിനുകൾ, വെടിയുണ്ടകൾ, ബോഡി ആർമർ എന്നിവയ്ക്ക് പുറമെ ബുള്ളറ്റ് പ്രൂഫ് ജാക്കറ്റുകളടക്കം കണ്ടെത്തി. വെളുത്ത വർഗക്കാരുടെ വംശീയ അധിനിവേശ ആശയങ്ങൾ പ്രകടിപ്പിക്കുന്ന ചിഹ്നങ്ങളും ലഘുലേഖകളും കണ്ടെത്തി. ഇന്ത്യൻ വംശജർക്കും ദക്ഷിണേഷ്യയിൽ നിന്നുള്ള മറ്റുള്ളവർക്കും എതിരെ ആക്രമണം നടത്താൻ ആഹ്വാനം ചെയ്യുന്ന പരാമർശങ്ങൾ അടങ്ങിയ ലഘുലേഖകളാണ് പിടിച്ചെടുത്തതെന്ന് എഫ്.ബി.ഐ ഉദ്യോഗസ്ഥർ വ്യക്തമാക്കി.
ഒക്ടോബർ 11-ന് ഒറോറ പ്രദേശത്തെ ഹിന്ദു ക്ഷേത്രം കേന്ദ്രീകരിച്ച് കൂട്ടവെടിവെപ്പ് നടത്താനായിരുന്നു പ്രതി പദ്ധതിയിട്ടിരുന്നതെന്ന് പൊലീസ് സംശയിക്കുന്നു. ആക്രമണ ഭീഷണിയുടെ പശ്ചാത്തലത്തിൽ ഒറോറ പൊലീസ് പ്രദേശത്തെ ഹിന്ദു ആരാധനാലയങ്ങൾക്ക് മുൻകരുതൽ മുന്നറിയിപ്പ് നൽകിയിട്ടുണ്ട്. തീവ്രവാദ ഭീഷണി മുഴക്കൽ ഉൾപ്പെടെയുള്ള കടുത്ത കുറ്റങ്ങൾ ചുമത്തി ഇയാളെ കസ്റ്റഡിയിൽ വിട്ടിരിക്കുകയാണ്. കേസിൽ കൂടുതൽ അന്വേഷണം തുടരുകയാണെന്ന് പ്രാദേശിക പൊലീസും എഫ്.ബി.ഐയും അറിയിച്ചു. ഒഹായോയിലെ റിച്ച്മണ്ട് ഹൈറ്റ്‌സിലുള്ള ശ്രീ സ്വാമിനാരായണൻ വഡ്താൽ ധാം ഹിന്ദു ക്ഷേത്രം ആക്രമിക്കപ്പെട്ട് ഒരാഴ്‌ചയ്ക്ക് ശേഷമാണ് അറസ്റ്റ്. റോളിംഗ് മെഡോസിലെ കുക്ക് കൗണ്ടി തേർഡ് മുനിസിപ്പൽ ഡിസ്ട്രിക്റ്റ് കോടതിയിൽ ഹാജരാക്കിയ പ്രതിയെ ജുഡീഷ്യൽ കസ്റ്റഡിയിൽ വിട്ടിരിക്കുകയാണ്.
