ജനൽ കർട്ടൻ പൈപ്പിന്റെ അറ്റത്ത് അലങ്കാരത്തിന് ഉപയോഗിക്കുന്ന സ്റ്റീൽ ബോളിലാണ് കുട്ടികൾ വെടിമരുന്ന് നിറച്ചത്
കണ്ണൂർ: കണ്ണൂർ വടക്കേ പൊയിലൂരിൽ സ്ഫോടനത്തിൽ പതിമൂന്നുകാരന് പരിക്കേറ്റ സംഭവത്തിൽ പൊട്ടിത്തെറിച്ചത് ബോംബ് അല്ലെന്ന് വിലയിരുത്തൽ. സ്റ്റീൽ ബോളിൽ ഓലപ്പടക്കത്തിലെ വെടിമരുന്ന് നിറച്ച് കത്തിച്ചതാണ് സ്ഫോടനത്തിന് കാരണമായതെന്നാണ് നിഗമനം. ജനൽ കർട്ടൻ പൈപ്പിന്റെ അറ്റത്ത് അലങ്കാരത്തിന് ഉപയോഗിക്കുന്ന സ്റ്റീൽ ബോളിലാണ് കുട്ടികൾ വെടിമരുന്ന് നിറച്ചത്. കളിക്കുന്നതിനിടെ സംഭവിച്ചതെന്ന് കുട്ടികളുടെ മൊഴി. ഫോറൻസിക് പരിശോധന ഫലത്തിന് ശേഷം സ്ഥിരീകരണമുണ്ടാകുമെന്ന് സൂചന. ഇന്നലെയാണ് കണ്ണൂർ വടക്കെ പൊയിലൂരുള്ള മുഹമ്മദ് ഷഹദിന് സ്ഫോടനത്തിൽ പരിക്കേറ്റത്. പരിക്കേറ്റ കുട്ടിയെ തലശേരി ഇന്ദിരാഗാന്ധി സഹകരണ ആശുപത്രിയിൽ പ്രവേശിപ്പിച്ചിരിക്കുകയാണ്.
