പി എൻ പണിക്കർ ഫൗണ്ടേഷന്റെ 'ആഴ്ചക്കൂട്ടം' പരിപാടിയിൽ മുൻ ഐഎഎസ് ഉദ്യോഗസ്ഥൻ കെ. മോഹൻദാസിന്റെ 'ഐ എ എസ് എസ്കലേറ്റർ' എന്ന പുസ്തകം ചർച്ച ചെയ്തു. ഒരു സിവിൽ സർവീസ് ഉദ്യോഗസ്ഥന്റെ ഔദ്യോഗിക ജീവിതത്തിലെ വെല്ലുവിളികളും ഭരണനിർവ്വഹണത്തിന്റെ സങ്കീർണ്ണതകളുമാണ് പുസ്തകത്തിന്റെ ഇതിവൃത്തം.
തിരുവനന്തപുരം: പി എൻ പണിക്കർ ഫൗണ്ടേഷന്റെ ആഭിമുഖ്യത്തിൽ നടത്തിവരുന്ന 'ആഴ്ചക്കൂട്ടം' പ്രതിവാര ചിന്താപരിപാടിയുടെ 820-ാം അധ്യായം തൈക്കാട് പി എൻ പണിക്കർ നോളജ് ഹാളിൽ നടന്നു. മുൻ ഷിപ്പിംഗ് സെക്രട്ടറിയും ഐഎഎസ് ഉദ്യോഗസ്ഥനുമായിരുന്ന കെ. മോഹൻദാസ് രചിച്ച 'ഐ എ എസ് എസ്കലേറ്റർ' (IAS Escalator) എന്ന പുസ്തകത്തെ കുറിച്ചുള്ള ഗൗരവകരമായ ചർച്ചയാണ് ഈ വാരത്തിൽ സംഘടിപ്പിച്ചത്. പ്രശസ്ത സാഹിത്യകാരനും വിദ്യാഭ്യാസ വിചക്ഷണനുമായ പ്രൊഫ. (ഡോ) ജോർജ്ജ് ഓണക്കൂർ ചടങ്ങ് ഉദ്ഘാടനം ചെയ്തു.
അഗ്രികൾച്ചർ പ്രൊഡക്ഷൻ കമ്മീഷണർ ഡോ. ബി അശോക് മുഖ്യപ്രഭാഷണം നടത്തി. പി എൻ പണിക്കർ ഫൗണ്ടേഷൻ വൈസ് ചെയർമാൻ എൻ ബാലഗോപാൽ ചടങ്ങിൽ അധ്യക്ഷത വഹിച്ചു. ഒരു സിവിൽ സർവീസ് ഉദ്യോഗസ്ഥൻ തന്റെ ഔദ്യോഗിക ജീവിതത്തിൽ നേരിടേണ്ടി വരുന്ന വെല്ലുവിളികളും ഭരണനിർവ്വഹണത്തിന്റെ സങ്കീർണ്ണതകളും ലളിതമായി പ്രതിപാദിക്കുന്ന കൃതിയാണ് 'ഐഎഎസ്. എസ്കലേറ്റർ'. കേന്ദ്ര-സംസ്ഥാന സർക്കാരുകളുടെ വിവിധ വകുപ്പുകളിൽ ഉന്നത പദവികൾ വഹിച്ച കാലത്തെ അനുഭവങ്ങളും രാഷ്ട്രീയ നേതൃത്വവുമായുള്ള ആശയവിനിമയങ്ങളും, സുപ്രധാന തീരുമാനങ്ങൾ എടുക്കേണ്ടി വന്ന സന്ദർഭങ്ങളും ഗ്രന്ഥകർത്താവ് ഈ പുസ്തകത്തിൽ സത്യസന്ധമായി വിവരിക്കുന്നുണ്ട്.
ഭരണചക്രത്തിന്റെ പിന്നാമ്പുറക്കാഴ്ചകൾക്കൊപ്പം തന്നെ ഐഎഎസ് ഉദ്യോഗസ്ഥർക്കിടയിലെ തൊഴിൽ സംസ്കാരവും സൗഹൃദങ്ങളും പുസ്തകത്തിൽ വിഷയമാകുന്നു. സിവിൽ സർവീസ് മോഹിക്കുന്നവർക്ക് ഒരു വഴികാട്ടിയായും, സാധാരണ വായനക്കാർക്ക് ഭരണകൂടത്തിന്റെ പ്രവർത്തനങ്ങളെക്കുറിച്ച് വ്യക്തമായ ചിത്രം നൽകുന്നതായും ഈ കൃതി മാറുന്നുവെന്ന് ചർച്ചയിൽ പങ്കെടുത്തവർ അഭിപ്രായപ്പെട്ടു. ചരിത്ര ഗവേഷകൻ ഡോ. എം ജി ശശിഭൂഷൺ പുസ്തക അവതരണം നടത്തി. തുടർന്ന് നടന്ന ചർച്ചയിൽ ഗ്രന്ഥകർത്താവ് കെ മോഹൻദാസ് ഐ.എ.എസ് (റിട്ട.) മറുപടി പ്രസംഗം നടത്തി. തന്റെ സർവീസ് കാലത്തെ അനുഭവങ്ങൾ പങ്കുവെച്ച അദ്ദേഹം സദസ്യരുടെ ചോദ്യങ്ങൾക്കും മറുപടി നൽകി. 2011 മുതൽ മുടങ്ങാതെ നടന്നു വരുന്ന ആഴ്ചക്കൂട്ടം പരിപാടിയുടെ ഭാഗമായി നടന്ന ചടങ്ങിൽ സാംസ്കാരിക-സാമൂഹിക രംഗത്തെ നിരവധി പ്രമുഖർ പങ്കെടുത്തു.
