കൊല്ലത്ത് ബൈക്ക് യാത്രികന് നേരെ കാട്ടാനയുടെ ആക്രമണം. പത്തനാപുരം സ്വദേശി ശശീന്ദ്രന് നേരെ ആണ് കാട്ടാന പാഞ്ഞടുത്തത്. അച്ചൻകോവിൽ റോഡിൽ ചെമ്പനരുവി ചെമ്പോല പൂവണ്ണിലാണ് സംഭവം.
കൊല്ലം: കാട്ടാന ആക്രമിക്കാൻ എത്തിയപ്പോൾ ബൈക്ക് ഉപേക്ഷിച്ചു ഓടിയ യാത്രക്കാരന് വീണു പരിക്ക്. പത്തനാപുരം വെള്ളംതെറ്റി ബിനീഷ് ഭവനിൽ ശശീന്ദ്രന് (64) ആണ് പരിക്കേറ്റത്. അച്ചൻകോവിൽ റോഡിൽ ചെമ്പനരുവി ചെമ്പോല പൂവണ്ണിൽ ഇന്നലെ വൈകിട്ട് ആറുമണിക്കായിരുന്നു സംഭവം.
അച്ചൻകോവിലിൽ നിന്ന് പത്തനാപുരത്തേക്ക് ബൈക്കിൽ വരികയായിരുന്നു ശശീന്ദ്രൻ. ഇടുങ്ങിയ റോഡും വളവുമുള്ള ഇവിടെ ആന അടുത്തെത്തിയപ്പോഴാണ് ശശീന്ദ്രൻ കണ്ടത്. രക്ഷപ്പെടാനായി ബൈക്ക് ഉപേക്ഷിച്ച് ഓടിയെങ്കിലും ആന പിന്നാലെ ചിഹ്നം വിളിച്ചു പാഞ്ഞു. കാലിൽ തുമ്പിക്കൈ കൊണ്ട് തൊട്ടതുപോലെ തോന്നിയപ്പോൾ റോഡ് വശത്തെ താഴ്ചയിലേക്ക് ശശീന്ദ്രൻ വീഴുകയായിരുന്നു. വീഴ്ചയിൽ രണ്ടു കാലിനും പരിക്കേറ്റു.
ആനയെ പേടിച്ച് പരിക്കേറ്റ കാലുമായി കാട്ടിൽ കുറ്റിച്ചെടികൾക്കിടയിൽ മണിക്കൂറുകളോളം മറഞ്ഞിരുന്നാണ് രക്ഷപ്പെട്ടത്. ഇതുവഴിയെത്തിയ ജീപ്പിലെ യാത്രക്കാർ കണ്ട് നിർത്തിയതോടെ ഇതിൽ കയറി ചെമ്പനരുവി കുട്ടുമുക്കിലെത്തി. ഇവിടെ നിന്ന് വനം വകുപ്പ് ഉദ്യോഗസ്ഥരുടെ ജീപ്പിലാണ് പത്തനാപുരത്തെ സ്വകാര്യ ആശുപത്രിയിലെത്തി ചികിത്സ തേടിയത്.
