തിരുവല്ലയിലും സമീപ പ്രദേശങ്ങളിലും തുടർച്ചയായി മോഷണം നടത്തിവന്ന അന്യസംസ്ഥാന തൊഴിലാളിയെ നാട്ടുകാർ പിടികൂടി പോലീസിലേൽപ്പിച്ചു. സേലം സ്വദേശിയായ മുത്തുച്ചാമിയാണ് പിടിയിലായത്. ഇയാളിൽ നിന്ന് മോഷണമുതലുകൾ പോലീസ് കണ്ടെടുത്തു.
പത്തനംതിട്ട: തിരുവല്ല നഗരത്തിലും സമീപ പ്രദേശങ്ങളിലുമുള്ള നിർമ്മാണം നടക്കുന്ന ഫ്ലാറ്റുകളിലും ആളൊഴിഞ്ഞ വീടുകളിലും കച്ചവട സ്ഥാപനങ്ങളിലും തുടർച്ചയായി മോഷണം നടത്തിവന്ന അന്യസംസ്ഥാന മോഷ്ടാവിനെ നാട്ടുകാർ പിടികൂടി പോലീസിലേൽപ്പിച്ചു. സേലം നേതാജി നഗർ സ്വദേശിയായ മുത്തുച്ചാമി (50) ആണ് പിടിയിലായത്.
കഴിഞ്ഞ ദിവസം ഉച്ചയോടെ തിരുവല്ല എംസിഎ ജംഗ്ഷന് സമീപം പ്രവർത്തിക്കുന്ന മൊബൈൽ ഷോപ്പിന്റെ ഷട്ടർ കുത്തിത്തുറന്ന് പ്രതി ഇൻവർട്ടർ മോഷ്ടിച്ചിരുന്നു. സ്ഥാപനത്തിലെ സിസിടിവി ദൃശ്യങ്ങൾ സഹിതം കടയുടമ തിരുവല്ല പോലീസിൽ പരാതി നൽകി. ഇതിനെത്തുടർന്ന് പോലീസും നാട്ടുകാരും ചേർന്ന് തിരച്ചിൽ നടത്തുന്നതിനിടയിലാണ് തിരുവല്ല പബ്ലിക് സ്റ്റേഡിയത്തിന് സമീപത്തു നിന്നും ഉച്ചകഴിഞ്ഞ് രണ്ടു മണിയോടെ പ്രതി നാട്ടുകാരുടെ പിടിയിലാവുന്നത്. വിവരമറിഞ്ഞ് സ്ഥലത്തെത്തിയ തിരുവല്ല പോലീസ് പ്രതിയെ കസ്റ്റഡിയിലെടുത്തു.
മോഷണമുതലുകൾ കണ്ടെടുത്തു
മോഷണം നടത്തുന്ന വസ്തുക്കൾ തിരുവല്ല മഴുവങ്ങാട് പ്രവർത്തിക്കുന്ന ആക്രിക്കടയിലാണ് വിറ്റിരുന്നത്. പ്രതിയുമായി ആക്രിക്കടയിലെത്തി തെളിവെടുപ്പ് നടത്തിയ പോലീസ് മോഷണമുതലുകൾ കണ്ടെടുത്തു. ഇതോടൊപ്പം വിവിധ സ്ഥലങ്ങളിലായി ഒളിപ്പിച്ചു വച്ചിരുന്ന ചില സാധനങ്ങളും പോലീസ് വീണ്ടെടുത്തിട്ടുണ്ട്. നിർമ്മാണം നടക്കുന്ന ഫ്ലാറ്റുകളിലും കച്ചവട സ്ഥാപനങ്ങളിലും വീടുകളിലും മോഷണം നടത്തിയത് താൻ തന്നെയെന്ന് ചോദ്യം ചെയ്യലിൽ പ്രതി സമ്മതിച്ചു.
Related Articles
തിരുവല്ല റെയിൽവേ സ്റ്റേഷന് സമീപം വയോധിക മാത്രം താമസിക്കുന്ന വീട്ടിൽ എത്തി പ്രതി നടത്തിയ മോഷണശ്രമത്തിന്റെ സിസിടിവി ദൃശ്യങ്ങളും പോലീസിന് ലഭ്യമായിട്ടുണ്ട്. കഴിഞ്ഞ ഒരു മാസക്കാലമായി പ്രദേശത്ത് അടച്ചിട്ട വീടുകളിലും ഫ്ലാറ്റുകളിലും മോഷണം പെരുകുന്നുവെന്ന പരാതികൾക്കിടയിലാണ് പ്രതി പിടിയിലാകുന്നത്.
മോഷണമുതൽ വിറ്റു കിട്ടുന്ന പണം മദ്യപാനത്തിനും ആഡംബര ജീവിതത്തിനു വേണ്ടിയുമാണ് പ്രതി ചെലവഴിച്ചിരുന്നതെന്ന് പോലീസ് വ്യക്തമാക്കി. എറണാകുളം ജില്ലയിലെ വിവിധ പോലീസ് സ്റ്റേഷനുകളിലും പ്രതിക്കെതിരെ സമാനമായ കേസുകൾ നിലവിലുണ്ട്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
