ഹൃദയത്തിലേക്കുള്ള രക്തയോട്ടം തടസപ്പെടുന്ന 'ട്രൈകസ്പിഡ് അട്രേസിയ' എന്ന ഹൃദ്രോഗമായിരുന്നു രാംരാജിന്. ശ്വാസം നിലയ്ക്കാറായ കൈക്കുഞ്ഞിന് ഹൃദ്യം പദ്ധതിയിലൂടെ ജീവിൻ തിരിച്ച് കിട്ടി.
തിരുവനന്തപുരം: സംസ്ഥാന സര്ക്കാരിന്റെ ഹൃദ്യം പദ്ധതിയിലൂടെ രക്ഷിച്ചെടുത്ത 5 മാസം പ്രായമുള്ള രാംരാജിന്റെ മാതാപിതാക്കളുമായി ആരോഗ്യ വകുപ്പ് മന്ത്രി വീണാ ജോര്ജ് വീഡിയോ കോളില് സംസാരിച്ചു. കുഞ്ഞിനെ ആരോഗ്യത്തോടെ തിരിച്ച് കിട്ടിയതിലുള്ള സന്തോഷം അവര് പങ്കുവച്ചു. ചൈല്ഡ് ഹെല്ത്ത് നോഡല് ഓഫീസര് ഡോ. രാഹുല് കാസര്ഗോഡ് കോട്ടൂരിലെ വീട്ടിലെത്തി കുഞ്ഞിനെയും മാതാപിതാക്കളെയും നേരില് കണ്ടു. കുഞ്ഞ് പൂര്ണ ആരോഗ്യവാനായിരിക്കുന്നുവെന്ന് ഡോ. രാഹുല് പറഞ്ഞു.
ഉത്തര്പ്രദേശ് സ്വദേശികളായ രുചിയുടേയും ശിശുപാലിന്റേയും മകനാണ് രാംരാജ്. രണ്ട് വർഷം മുമ്പാണ് യുപി ധനൗറ സ്വദേശിയും പുല്ലുവെട്ടുയന്ത്രം ഓപ്പറേറ്ററുമായ ശിശുപാലും ഭാര്യയും കോട്ടൂര് ആരോഗ്യകേന്ദ്രത്തിന് സമീപം താമസമാക്കിയത്. ഹൃദയത്തിലേക്കുള്ള രക്തയോട്ടം തടസപ്പെടുന്ന 'ട്രൈകസ്പിഡ് അട്രേസിയ' എന്ന ഹൃദ്രോഗമായിരുന്നു രാംരാജിന്. ശ്വാസം നിലയ്ക്കാറായ കൈക്കുഞ്ഞ് രാംരാജുമായി മുളിയാര് സാമൂഹ്യാരോഗ്യ കേന്ദ്രത്തിലേക്ക് ശിശുപാല് എത്തിയതാണ് കുഞ്ഞിന് പുതുജീവനേകിയത്. കുഞ്ഞിന്റെ രക്തത്തില് ഓക്സിജന്റെ അളവ് കുറവായിരുന്നു. തുടര്ന്ന് കുഞ്ഞിനെ കണ്ണൂര് ഗവ. മെഡിക്കല് കോളേജിലേക്ക് റഫര് ചെയ്തു.
കുഞ്ഞിന് ഹൃദയസംബന്ധമായ പ്രശ്നമാണെന്ന് തിരിച്ചറിഞ്ഞതോടെ മുളിയാര് സാമൂഹ്യാരോഗ്യ കേന്ദ്രത്തിലെ ഫീല്ഡ് സ്റ്റാഫ് അതിവേഗം ആരോഗ്യവകുപ്പിന്റെ 'ഹൃദ്യം' പദ്ധതിയില് രജിസ്റ്റര് ചെയ്തു. ഹൃദയത്തിലേക്കുള്ള രക്തയോട്ടം തടസപ്പെടുത്തുന്ന 'ട്രൈകസ്പിഡ് അട്രേസിയ' എന്ന ഹൃദ്രോഗമായിരുന്നു രാംരാജിന്. തുടര്ന്ന് ആരോഗ്യ വകുപ്പ് വേഗത്തില് ഇടപെടുകയും കോഴിക്കോടുള്ള ഹൃദ്യം എംപാനല്ഡ് ആശുപത്രിയില് വെള്ളിയാഴ്ച സൗജന്യമായി ശസ്ത്രക്രിയ നടത്തുകയും ചെയ്തു. കേരളത്തിനും ഇവിടുത്തെ ആരോഗ്യ പ്രവര്ത്തകര്ക്കും രുചിയും ശിശുപാലും നന്ദി പറഞ്ഞു. കേരളത്തിലായത് കൊണ്ടാണ് തങ്ങളുടെ കുഞ്ഞിന് ലക്ഷങ്ങള് ചിലവുള്ള ചികിത്സ മള്ട്ടിസ്പെഷ്യാലിറ്റി ആശുപത്രിയില് തികച്ചും സൗജന്യമായി ലഭ്യമായതെന്നും അവര് പറഞ്ഞു.
