കുറഞ്ഞ പലിശ നിരക്കിൽ ആകൃഷ്ടരായി ഹോം ലോൺ മറ്റൊരു ബാങ്കിലേക്ക് മാറ്റുന്നത് എല്ലായ്പ്പോഴും ലാഭകരമാകണമെന്നില്ല. പ്രൊസസിംഗ് ഫീസ്, ലോണിന്റെ ബാക്കിയുള്ള കാലാവധി, തിരിച്ചടവ് കാലാവധി നീട്ടുന്നത് വഴിയുള്ള മൊത്തം പലിശയിലെ വർദ്ധനവ് എന്നിവ പരിഗണിക്കാതെ തീരുമാനമെടുത്താൽ സാമ്പത്തിക നഷ്ടം സംഭവിക്കാം.
ഹോം ലോണിന്റെ പ്രതിമാസ തിരിച്ചടവ് ഭാരമായി തോന്നുമ്പോൾ, മറ്റ് ബാങ്കുകൾ നൽകുന്ന കുറഞ്ഞ പലിശ നിരക്കിലുള്ള പരസ്യങ്ങൾ നമ്മെ ആകർഷിക്കാറുണ്ട്. വായ്പയിനത്തിൽ ബാക്കി നിൽക്കുന്ന തുക മറ്റൊരു ബാങ്കിലേക്ക് മാറ്റുന്നതിനെയാണ് ഹോം ലോൺ ബാലൻസ് ട്രാൻസ്ഫർ എന്ന് പറയുന്നത്. ഇത് വഴി വലിയ തുക ലാഭിക്കാം എന്നാണ് നമ്മൾ മിക്കപ്പോഴും ചിന്തിക്കുന്നത്. എന്നാൽ ചില പ്രധാന കാര്യങ്ങൾ ശ്രദ്ധിച്ചില്ലെങ്കിൽ ലാഭത്തിന് പകരം വലിയ നഷ്ടമാകും സംഭവിക്കുക. ലോൺ ബാലൻസ് ട്രാൻസ്ഫർ ചെയ്യുന്നതിന് മുൻപ് ശ്രദ്ധിക്കേണ്ട പ്രധാന കാര്യങ്ങൾ എന്തൊക്കെയാണെന്ന് നോക്കാം.
പലിശ നിരക്ക് മാത്രമല്ല നോക്കേണ്ടത്
മറ്റ് ബാങ്കുകൾ പരസ്യത്തിൽ പറയുന്ന കുറഞ്ഞ പലിശ നിരക്ക് കണ്ട് മാത്രം ചാടിവീഴരുത്. ലോൺ മാറ്റുമ്പോൾ പുതിയ ബാങ്കിൽ പ്രൊസസിംഗ് ഫീസ്, ലീഗൽ ചാർജ്ജ്, വാല്യൂവേഷൻ ഫീസ് എന്നിവ നൽകേണ്ടി വരും. നിലവിലെ പലിശയും പുതിയ പലിശയും തമ്മിൽ നേരിയ വ്യത്യാസം മാത്രമേ ഉള്ളൂ എങ്കിൽ, ഈ അധിക ചെലവുകൾ കാരണം നിങ്ങൾക്ക് ലാഭത്തേക്കാൾ കൂടുതൽ നഷ്ടം വരാൻ സാധ്യതയുണ്ട്.
ലോൺ കാലാവധിയുടെ ഏത് ഘട്ടം?
ഹോം ലോണിന്റെ ആദ്യ വർഷങ്ങളിൽ ഇഎംഐയുടെ വലിയൊരു ഭാഗം പലിശ ഇനത്തിലേക്കാണ് പോകുന്നത്. അതിനാൽ, ലോൺ എടുത്ത് ആദ്യ വർഷങ്ങളിലാണ് ബാങ്ക് മാറുന്നതെങ്കിൽ വലിയ തുക ലാഭിക്കാൻ സാധിക്കും. എന്നാൽ, ലോൺ കാലാവധി തീരാൻ ഏതാനും വർഷങ്ങൾ മാത്രം ബാക്കിയുള്ളപ്പോഴാണ് മാറുന്നതെങ്കിൽ, പലിശ ഭൂരിഭാഗവും നിങ്ങൾ ഇതിനകം അടച്ചുതീർത്തതിനാൽ വലിയ സാമ്പത്തിക നേട്ടമുണ്ടാകില്ല.
Related Articles
പരസ്യത്തിലെ പലിശ നിരക്ക്
ബാങ്കുകൾ പരസ്യം ചെയ്യുന്ന ഏറ്റവും കുറഞ്ഞ പലിശ നിരക്ക് എല്ലാ അപേക്ഷകർക്കും ലഭിക്കില്ല. നിങ്ങളുടെ സിബിൽ സ്കോർ, നിലവിലെ വരുമാനം, കൃത്യമായി ഇഎംഐ അടച്ചിട്ടുണ്ടോ എന്നെല്ലാം പരിശോധിച്ച ശേഷമേ ബാങ്ക് നിങ്ങൾക്ക് അനുയോജ്യമായ നിരക്ക് നിശ്ചയിക്കൂ. കഴിഞ്ഞ കുറച്ചുകാലത്തിനിടയിൽ നിങ്ങളുടെ സാമ്പത്തിക ഭദ്രതയ്ക്ക് എന്തെങ്കിലും ഇടിവ് സംഭവിച്ചിട്ടുണ്ടെങ്കിൽ, പരസ്യത്തിൽ കാണുന്ന കുറഞ്ഞ നിരക്ക് നിങ്ങൾക്ക് ലഭിച്ചേക്കില്ല.
കുറഞ്ഞ ഇഎംഐ എപ്പോഴും ലാഭമല്ല
മറ്റൊരു ബാങ്കിലേക്ക് മാറുമ്പോൾ ഇഎംഐ തുക ഗണ്യമായി കുറയുന്നത് വഴി നിങ്ങൾക്ക് ആശ്വാസം തോന്നാം. എന്നാൽ ചിലപ്പോൾ ലോണിന്റെ തിരിച്ചടവ് കാലാവധി (Tenure) നീട്ടുന്നത് കൊണ്ടായിരിക്കാം ഇഎംഐ കുറയുന്നത്. കാലാവധി കൂടുമ്പോൾ, മാസം അടയ്ക്കുന്ന തുക കുറയുമെങ്കിലും മൊത്തത്തിൽ ബാങ്കിലേക്ക് അടച്ചുതീർക്കേണ്ടി വരുന്ന പലിശ നിരക്ക് വൻതോതിൽ വർദ്ധിക്കും. ഇത് ദീർഘകാലാടിസ്ഥാനത്തിൽ വലിയ നഷ്ടമാണ് വരുത്തിവെക്കുക.
ഹോം ലോൺ ബാലൻസ് ട്രാൻസ്ഫർ ചെയ്യുന്നത് നല്ലൊരു സാമ്പത്തിക നീക്കമാണ്. പക്ഷേ അത് കൃത്യമായ കണക്കുകൂട്ടലുകളോടെ വേണം ചെയ്യാൻ. പലിശ നിരക്ക്, ബാക്കി നിൽക്കുന്ന കാലാവധി, മറ്റ് ചെലവുകൾ, വായ്പയുടെ നിബന്ധനകൾ എന്നിവയെല്ലാം ഒത്തുനോക്കി യഥാർത്ഥത്തിൽ പണം ലാഭിക്കാൻ കഴിയുമെന്ന് ഉറപ്പുവരുത്തിയ ശേഷം മാത്രം അന്തിമ തീരുമാനമെടുക്കുക.
