മാസത്തിലെ ഏതെങ്കിലും ഒരു പ്രത്യേക ദിവസം എസ്ഐപി ചെയ്യുന്നത് ഉയര്ന്ന വരുമാനം നല്കുമോ? എസ്ഐപി തീയതിയുടെ പ്രാധാന്യം വളരെ കുറവാണെന്നാണ് ഈ വിഷയത്തില് നടന്ന പഠനങ്ങളെല്ലാം കാണിക്കുന്നത്.
എസ്ഐപി നിക്ഷേപത്തിന് ഏറ്റവും അനുയോജ്യമായ തീയതി ഏതാണ് എന്നത് നിക്ഷേപകരെ ആശയക്കുഴപ്പത്തിലാക്കുന്ന ഒരു ചോദ്യമാണ്. മാസത്തിലെ ഏതെങ്കിലും ഒരു പ്രത്യേക ദിവസം എസ്ഐപി ചെയ്യുന്നത് ഉയര്ന്ന വരുമാനം നല്കുമോ? വിപണിയുടെ ചാഞ്ചാട്ടം കാരണം, കുറഞ്ഞ നെറ്റ് അസറ്റ് വാല്യൂ ഉള്ള ദിവസം നിക്ഷേപിച്ചാല് കൂടുതല് യൂണിറ്റുകള് ലഭിക്കുമെന്നും, അതുവഴി ദീര്ഘകാലാടിസ്ഥാനത്തില് കൂടുതല് നേട്ടമുണ്ടാക്കാമെന്നുമാണ് പലരുടെയും ധാരണ.
എന്നാല്, എസ്ഐപി തീയതിയുടെ പ്രാധാന്യം വളരെ കുറവാണെന്നാണ് ഈ വിഷയത്തില് നടന്ന പഠനങ്ങളെല്ലാം കാണിക്കുന്നത്. കഴിഞ്ഞ 10-15 വര്ഷത്തെ കണക്കുകള് പരിശോധിച്ചാല്, മാസത്തിലെ ഒന്നിനോ, പത്തിനോ, 25-നോ നിക്ഷേപിക്കുമ്പോള് ലഭിക്കുന്ന നേട്ടത്തിലെ വ്യത്യാസം വെറും 0.2-0.3% മാത്രമാണ്. അതായത്, ഏത് ഫണ്ട് തിരഞ്ഞെടുക്കുന്നു, എത്രകാലം നിക്ഷേപിക്കുന്നു എന്നതിനെ അപേക്ഷിച്ച് നോക്കുമ്പോള് എസ്ഐപി ചെയ്യുന്ന തീയതി ദീര്ഘകാലാടിസ്ഥാനത്തില് അത്ര പ്രധാനമല്ല.
സാമ്പത്തിക വിദഗ്ദ്ധരുടെ അഭിപ്രായം
എസ്ഐപി തീയതി നിക്ഷേപകന് വരുമാനം ലഭിക്കുന്ന ദിവസത്തിനനുസരിച്ച് തിരഞ്ഞെടുക്കുന്നതാണ് ഉചിതമെന്നാണ് വിദഗ്ധര് പറയുന്നത്. ഉദാഹരണത്തിന്, ശമ്പളക്കാര്ക്ക് ശമ്പളം കിട്ടുന്ന ഉടന്, അതായത് മാസത്തിലെ ഒന്ന്, അഞ്ച്, അല്ലെങ്കില് ഏഴ് തീയതികളില് നിക്ഷേപിക്കാം. ഇത് സാമ്പത്തിക അച്ചടക്കം വളര്ത്താന് സഹായിക്കും. അതോടെ പേയ്മെന്റ് മുടങ്ങാനുള്ള സാധ്യതയും കുറയും. ഹ്രസ്വകാലത്തെ വിപണിയിലെ ചാഞ്ചാട്ടം കുറയ്ക്കാന് വേണ്ടി സിപ് നിക്ഷേപം മാസത്തിലെ രണ്ടോ മൂന്നോ തീയതികളിലായി വിഭജിക്കാവുന്നതാണ് എന്നാണ്. ഉദാഹരണത്തിന്, 9,000 രൂപയാണ് പ്രതിമാസം നിക്ഷേപിക്കുന്നതെങ്കില്, 3,000 രൂപ വീതം അഞ്ച്, 15, 25 തീയതികളിലായി നിക്ഷേപിക്കാം. ഇതിലൂടെ വിവിധ എന്എവിയില് നിക്ഷേപിക്കാന് സാധിക്കും.
Related Articles
അച്ചടക്കമാണ് പ്രധാനം
എസ്ഐപി തീയതിക്ക് കാര്യമായ പ്രാധാന്യമില്ലെങ്കിലും, സൗകര്യപ്രദമായ ഒരു തീയതി തിരഞ്ഞെടുക്കുന്നത് നിക്ഷേപകന് മാനസികമായും ഏറെ ഗുണം ചെയ്യും. മോശം സിപ് തീയതി കാരണം നിക്ഷേപകര്ക്ക് പണം നഷ്ടമാകാറില്ല. മറിച്ച്, വിപണിയിലെ ഇടിവ് കാരണം പലരും നിക്ഷേപം മുടക്കുകയോ നിര്ത്തുകയോ ചെയ്യുമ്പോഴാണ് നഷ്ടമുണ്ടാകുന്നത്. ശമ്പളം ലഭിക്കുന്ന തീയതിയുമായി ബന്ധിപ്പിച്ച ഒരു നിശ്ചിത തീയതി തിരഞ്ഞെടുക്കുന്നത് ഒരു ബില്ലോ ഇഎംഐയോ അടയ്ക്കുന്നതുപോലെ നിക്ഷേപത്തെ ഒരു ശീലമാക്കി മാറ്റാന് സഹായിക്കുന്നു. തിരഞ്ഞെടുക്കുന്ന ഫണ്ട്, ഫണ്ട് മാനേജറുടെ കഴിവ്, നിക്ഷേപം എത്രകാലം തുടരുന്നു എന്നിവയാണ് നിങ്ങളുടെ ദീര്ഘകാല വളര്ച്ചയില് വലിയ മാറ്റമുണ്ടാക്കുക. എത്രത്തോളം കാലം നിക്ഷേപകനായി തുടരുന്നുവോ അത്രത്തോളം പണം കൂടും.
ഉദാഹരണത്തിന്, ഒരു ഇക്വിറ്റി മ്യൂച്വല് ഫണ്ടില് പ്രതിമാസം 10,000 രൂപ വീതം 20 വര്ഷം നിക്ഷേപിച്ചാല്, ശരാശരി 12% വരുമാനം കണക്കാക്കിയാല് അത് ഏകദേശം 98 ലക്ഷം രൂപയായി വളരും. മറ്റൊരു സിപ് തീയതിക്ക് 0.2% അധിക വരുമാനം നല്കാന് കഴിഞ്ഞാല് പോലും, ആ അധിക നേട്ടം ഏതാനും ആയിരം രൂപ മാത്രമായിരിക്കും. ഇത് കൃത്യമായി നിക്ഷേപം തുടരുന്നതിന്റെ പ്രാധാന്യവുമായി താരതമ്യം ചെയ്യുമ്പോള് വളരെ ചെറിയ തുകയാണ്.
