ഓസ്ട്രേലിയയിലെ ആഭ്യന്തര ടി20 ലീഗായ ബിഗ് ബാഷ് ലീഗില് കളിക്കാന് മുന് ഇന്ത്യൻ പേസര് സിദ്ധാര്ത്ഥ് കൗള് പേര് രജിസ്റ്റര് ചെയ്തു. ബിഗ് ബാഷില് കളിക്കാന് പേര് രജിസ്റ്റര് ചെയ്ത ഒരേയൊരു ഇന്ത്യൻ താരം കൂടിയാണ് സിദ്ധാര്ത്ഥ് കൗള്.
ചണ്ഡീഗഡ്: ഓസ്ട്രേലിയയിലെ ആഭ്യന്തര ടി20 ലീഗായ ബിഗ് ബാഷ് ലീഗില് കളിക്കാന് പേര് രജിസ്റ്റര് ചെയ്ത് മുന് ഇന്ത്യൻ പേസര് സിദ്ധാര്ത്ഥ് കൗള്. കഴിഞ്ഞ വര്ഷം നവംബറിലാണ് സിദ്ധാര്ത്ഥ് കൗള് ഇന്ത്യൻ ക്രിക്കറ്റില് നിന്ന് വിരമിക്കല് പ്രഖ്യാപിച്ചത്. ബിഗ് ബാഷ് ലീഗില് കളിക്കാന് പേര് രജിസ്റ്റര് ചെയ്ത ഒരേയൊരു ഇന്ത്യൻ താരം കൂടിയാണ് സിദ്ധാര്ത്ഥ് കൗള്. ഇന്ത്യൻ പുരുഷ താരങ്ങളാരും ഇതുവരെ ബിഗ് ബാഷില് കളിച്ചിട്ടില്ല. വ്യാഴാഴ്ചയാണ് ബിഗ് ബാഷിലേക്കുള്ള താരലേലം നടക്കുക.
വനിതാ ബിഗ് ബാഷില് കളിക്കാനായി 15 ഇന്ത്യൻ താരങ്ങളും പേര് രജിസ്റ്റര് ചെയ്തിട്ടുണ്ട്. കഴിഞ്ഞ വര്ഷം ഇന്ത്യക്കായി അരങ്ങേറിയ ആര്സിബി വനിതാ ടീം അംഗമായ കനിക അഹൂജയും പേര് രജിസ്റ്റര് ചെയ്ത വനിതാ താരങ്ങളില് പെടുന്നു. ജെമീമ റോഡ്രിഗസ്, ശിഖ പാണ്ഡെ, രാധാ യാദവ്, യാസ്തിക ഭാട്ടിയ, എസ് മേഘ്ന, അരുന്ധതി റെഡ്ഡി, പ്രതിക റാവല്, അണ്ടര് 19 വനിതാ ലോകകപ്പ് ജയിച്ച ടീമിന്റെ ക്യാപ്റ്റനായ നിക്കി പ്രസാദ്, ഉമ ഛേത്രി, കഷ്വീ ഗൗതം, പ്രിയ മിശ്ര എന്നിവരും വനിതാ ബിഗ് ബാഷില് കളിക്കാന് പേര് രജിസ്റ്റര് ചെയ്തിട്ടുണ്ട്.
പുരുഷ ബിഗ് ബാഷില് ലേലത്തിനായി പേര് രജിസ്റ്റര് ചെയ്ത സിദ്ധാര്ത്ഥ് കൗൾ ഇന്ത്യൻ കുപ്പായത്തില് ആറ് മത്സരങ്ങളില് മാത്രമാണ് കളിച്ചത്. 2018 ജൂണ് മുതല് 2019 വരെയുള്ള കാലയളവില് മൂന്ന് ഏകദിനത്തിലും മൂന്ന് ടി20 മത്സരങ്ങളിലുമാണ് സിദ്ധാര്ത്ഥ് കൗള് ഇന്ത്യക്കായി കളിച്ചത്. മുഷ്താഖ് അലി ട്രോഫിയില് പഞ്ചാബ് ആദ്യമായി കിരീടം നേടിയ കഴിഞ്ഞ സീസണില് 10 കളികളില് 16 വിക്കറ്റുകള് നേടിയ കൗള് തിളങ്ങിയിരുന്നു.
Related Articles
17 വര്ഷം നീണ്ട ഫസ്റ്റ് ക്ലാസ് ക്രിക്കറ്റില് 88 മത്സരങ്ങളില് 297 വിക്കറ്റ് വീഴ്ത്തിയ സിദ്ധാര്ത്ഥ് കൗള്, ലിസ്റ്റ് എ ക്രിക്കറ്റില് 199 വിക്കറ്റുകളും ടി20കളില് 182 വിക്കറ്റും നേടിയിട്ടുണ്ട്.പതിനേഴാം വയസില് പഞ്ചാബ് ടീമിലെത്തിയ സിദ്ധാര്ത്ഥ് കൗള് മലേഷ്യയില് നടന്ന അണ്ടര് 19 ലോകകപ്പില് വിരാട് കോലിയുടെ നേതൃത്വത്തില് കിരീടം നേടിയ ഇന്ത്യൻ ടീമില് അംഗമായിരുന്നു. മുഷ്താഖ് അലിയിലും(120) വിജയ് ഹസാരെയിലും(155) ഏറ്റവും കൂടുതല് വിക്കറ്റെടുത്ത ബൗളർ കൂടിയാണ് സിദ്ധാര്ത്ഥ് കൗള്.
ഐപിഎല്ലില് സണ്റൈസേഴ്സ് ഹൈദരാബാദിനായി മികച്ച പ്രകടനം പുറത്തെടുത്തതോടെ 2018ല് അയര്ലന്ഡ് പര്യടനത്തിൽ ഇന്ത്യൻ ടീമില് കൗള് അരങ്ങേറി. 2017 ഐപിഎല്ലില് 10 കളികളില് 16ഉം 20018ല് റണ്ണേഴ്സ് അപ്പായ ഹൈദരാബാദിനായി 21 വിക്കറ്റും വീഴ്ത്തി കൗള് തിളങ്ങി. ഐപിഎല്ലില് 55 മത്സരങ്ങളില് 58 വിക്കറ്റുകളാണ് സമ്പാദ്യം. ഹൈദരാബാദിന് പുറമെ ഡല്ഹി ക്യാപിറ്റല്സ്, കൊല്ക്കത്ത നൈറ്റ് റൈഡേഴ്സ്, റോയല് ചലഞ്ചേഴ്സ് ബെംഗളൂരു ടീമുകള്ക്കായും കൗള് കളിച്ചിട്ടുണ്ട്.
