നടൻ കൃഷ്ണകുമാറിന്റെ ഭാര്യ സിന്ധുവിന്റെ അച്ഛൻ കഴിഞ്ഞ ദിവസം അന്തരിച്ചിരുന്നു. ഇതിനിടെ, സിന്ധു പങ്കുവെച്ച വീഡിയോക്ക് താഴെ, മരണത്തെ കണ്ടന്റാക്കി വ്യൂസ് നേടുന്നു എന്നാരോപിച്ച് ഒരാൾ പരിഹാസ കമന്റിട്ടു.
മലയാളികൾക്ക് ഏറെ പ്രിയങ്കരമായ താര കുടുംബമാണ് നടൻ കൃഷ്ണ കുമാറിന്റേത്. നാല് മക്കളും ഭാര്യ സിന്ധുവും അടങ്ങുന്നതായിരുന്നു കൃഷ്ണ കുമാറിന്റെ കുടുംബം. എന്നാൽ ദിയ വിവാഹം കഴിച്ചതോടെ അശ്വിനും ഇവരുടെ മകൻ ഓമിയും കുടുംബത്തിന്റെ ഭാഗമാണ്. യുട്യൂബർമാരായ ഇവർ പങ്കുവയ്ക്കുന്ന വീഡിയോകളെല്ലാം ഏറെ ശ്രദ്ധനേടാറുണ്ട്. കഴിഞ്ഞ ദിവസം ഈ കുടുംബത്തെ തേടി എത്തിയത് ഒരു ദുഃഖ വാർത്തയായിരുന്നു. സിന്ധുവിന്റെ അച്ഛൻ എസ്. രംഗനാഥന്റെ വിയോഗമായിരുന്നു ഇത്. ഫോളോവേഴ്സ് എല്ലാവരും അവരുടെ ദുഃഖത്തിൽ പങ്കുചേരുകയും ചെയ്തു.
ഇതിനിടെ പരിഹാസ കമന്റുമായെത്തിയ വ്യാജന് അഹാന കൃഷ്ണ നൽകിയ മറുപടി ശ്രദ്ധനേടുകയാണ്. തന്റെ അച്ഛനൊപ്പം ദിയയുടെ മകൻ ഓമി ഇരിക്കുന്ന വീഡിയോ സിന്ധു കൃഷ്ണ പങ്കുവച്ചിരുന്നു. ഇതിന് താഴെ ആയിരുന്നു മോശം കമന്റ് വന്നത്. അഹാനയെ ടാഗ് ചെയ്ത് കൊണ്ടായിരുന്നു ഇയാളുടെ പരിഹാസം.
വിന്റേജ് 232323 എന്ന വ്യാജ അക്കൗണ്ടിൽ നിന്നുമാണ് കമന്റ് വന്നിരിക്കുന്നത്. 'വീഡിയോ ഉണ്ടാക്കാനായി പുതിയ കണ്ടന്റ് ലഭിച്ചു. നാണമില്ലാത്ത ആളുകൾ. പപ്പ മരിച്ചു 56 മില്യൺ വ്യൂസ് എന്നാണ് നിങ്ങൾ പറയുന്നത്. മറ്റൊരാൾ അപ്ലോഡ് ചെയ്യും, എൻ്റെ മുത്തച്ഛൻ്റെ ചില ഗ്ലിംപ്സ് നിങ്ങൾക്ക് നഷ്ടമാകും.. 1 മില്യൺ വ്യൂസ്', എന്നായിരുന്നു കമന്റ്. ഇത് ശ്രദ്ധയിൽപ്പെട്ട അഹാന മറുപടിയുമായി എത്തി. 'നരകത്തിൽ പോകാൻ നിങ്ങളോട് ആവശ്യപ്പെടില്ല. കാരണം നരകം പോലും അവരുടെ അംഗങ്ങൾക്ക് മിനിമം മാന്യത പ്രതീക്ഷിക്കുന്നുണ്ടെന്നാണ് ഞാൻ കരുതുന്നത്', എന്നായിരുന്നു അഹാനയുടെ മറുപടി.
