- Home
- Technology
- Gadgets (Technology)
- ഐഫോൺ ഫോൾഡ് ഈ വർഷം എത്തും; വില, ബാറ്ററി, ഡിസൈൻ, ഡിസ്പ്ലേ അടക്കമുള്ള വിവരങ്ങൾ പുറത്ത്
ഐഫോൺ ഫോൾഡ് ഈ വർഷം എത്തും; വില, ബാറ്ററി, ഡിസൈൻ, ഡിസ്പ്ലേ അടക്കമുള്ള വിവരങ്ങൾ പുറത്ത്
ആപ്പിളിന്റെ ചരിത്രത്തിലെ ആദ്യ ഫോള്ഡബിള് സ്മാര്ട്ട്ഫോണ് (iPhone Fold) പുറത്തിറക്കാനിരിക്കുകയാണ്. ലോഞ്ചിന് മുമ്പ് ഐഫോണ് ഫോള്ഡിന്റെ ബാറ്ററി, ഡിസൈന്, ഡിസ്പ്ലെ, വില അടക്കം കിംവദന്തികള് പരക്കുന്നു.
കുപെർട്ടിനോ ആസ്ഥാനമായ ടെക് ഭീമനായ ആപ്പിൾ തങ്ങളുടെ ഐഫോണിൽ വീണ്ടും വലിയ രൂപകൽപ്പന മാറ്റത്തിന് ഒരുങ്ങുകയാണ്. ആൻഡ്രോയ്ഡ് ബ്രാൻഡുകൾ വേഗത്തിൽ ഫോൾഡബിൾ ഫോണുകൾ പുറത്തിറക്കുമ്പോഴും ആപ്പിൾ പതിവുപോലെ സൂക്ഷ്മമായി നിരീക്ഷിച്ച് ആശയങ്ങൾ മിനുക്കിയ ശേഷമാണ് രംഗത്തെത്താൻ തീരുമാനിച്ചതെന്നാണ് സൂചന. വിതരണ ശൃംഖലകളിൽ നിന്നുള്ള വിവരങ്ങളും വ്യവസായ റിപ്പോർട്ടുകളും അനുസരിച്ച്, കമ്പനി ആദ്യ ഫോൾഡബിൾ ഐഫോൺ 2026ൽ അവതരിപ്പിക്കാനാണ് ലക്ഷ്യമിടുന്നത്. ഇത് ഐഫോൺ ചരിത്രത്തിലെ ഏറ്റവും വലിയ ഡിസൈൻ മാറ്റങ്ങളിൽ ഒന്നായി മാറാൻ സാധ്യതയുണ്ട്.
‘ഐഫോൺ ഫോൾഡ്’ എന്ന് അനൗദ്യോഗികമായി വിളിക്കപ്പെടുന്ന ഈ ഡിവൈസ് പുസ്തകശൈലിയിൽ തുറക്കുന്ന തരത്തിലായിരിക്കും. അടച്ചിരിക്കുമ്പോൾ ഏകദേശം 5.3 മുതൽ 5.5 ഇഞ്ച് വരെയുള്ള പുറം സ്ക്രീൻ ലഭിക്കാമെന്നാണ് റിപ്പോർട്ട്. തുറക്കുമ്പോൾ 7.7 മുതൽ 7.8 ഇഞ്ച് വരെ വ്യാപിക്കുന്ന ഉൾഡിസ്പ്ലേ നൽകാനാണ് സാധ്യത. ഇതിലൂടെ ചെറിയ ടാബ്ലറ്റിന്റെ അനുഭവം ലഭിക്കും. അൾട്രാ-തിൻ ഗ്ലാസ്, പോളിമർ ലെയറുകൾ എന്നിവ ചേർത്ത് ദൈർഘ്യമേറിയ ഉപയോഗം ഉറപ്പാക്കുന്ന പുതിയ സംരക്ഷണ സംവിധാനങ്ങൾ ആപ്പിൾ പരീക്ഷിക്കുകയാണെന്നാണ് വിവരം.
ഫോൾഡബിൾ ഫോണുകളിൽ സാധാരണ കാണുന്ന മടക്കരേഖ അഥവാ ക്രീസ് (crease) കുറയ്ക്കാൻ പ്രത്യേക മെറ്റൽ പ്ലേറ്റ്, ലിക്വിഡ് മെറ്റൽ ഹിഞ്ച് ഘടകങ്ങൾ എന്നിവ ഉപയോഗിക്കാനാണ് കമ്പനിയുടെ ശ്രമമെന്ന് വ്യവസായ വൃത്തങ്ങൾ പറയുന്നു. ടൈറ്റാനിയം ഫ്രെയിം ഉൾപ്പെടുന്ന കരുത്തുറ്റ നിർമ്മാണ ഗുണമേന്മയും പ്രതീക്ഷിക്കുന്നു.
ക്യാമറ വിഭാഗത്തിൽ 48-മെഗാപിക്സൽ സെൻസറുകളുള്ള ഡ്യുവൽ റിയർ ക്യാമറ സംവിധാനമുണ്ടാകാമെന്നാണ് ചോർന്ന വിവരങ്ങൾ സൂചിപ്പിക്കുന്നത്. അകത്തും പുറത്തുമായി വ്യത്യസ്ത ഫ്രണ്ട് ക്യാമറകൾ ലഭിക്കാനിടയുണ്ട്. ഉൾസ്ക്രീനിൽ സ്ക്രീൻ-താഴെ മറഞ്ഞ ക്യാമറ സാങ്കേതികവിദ്യയും പരീക്ഷണത്തിലാണെന്നാണ് സൂചകൾ. ഫേസ് ഐഡി ഒഴിവാക്കി സൈഡ് ബട്ടണിൽ ഉൾപ്പെടുത്തിയ ടച്ച് ഐഡി തിരിച്ചുവരാമെന്ന റിപ്പോർട്ടും ശ്രദ്ധേയമാണ്. കൂടാതെ, കമ്പനി സ്വന്തം മോഡം ചിപ്പ് ഉപയോഗിക്കാനും ഇ-സിം മാത്രം പിന്തുണയ്ക്കാനും സാധ്യതയുണ്ട്.
ഉയർന്ന ഊർജ സാന്ദ്രതയുള്ള ബാറ്ററി സെല്ലുകൾ ഉപയോഗിച്ച് ഇതുവരെ പുറത്തിറങ്ങിയ ഐഫോണുകളിൽ ഏറ്റവും വലിയ ബാറ്ററി ഉൾപ്പെടുത്താനും ശ്രമം നടക്കുന്നുണ്ട് എന്നാണ് വിവരം. ഐഫോൺ ഫോൾഡിന്റെ വില 1,800 മുതൽ 2,500 യുഎസ് ഡോളർ വരെ ആയിരിക്കാമെന്നും ഇത് ആപ്പിളിന്റെ ഏറ്റവും വിലയേറിയ ഐഫോൺ ആകാമെന്നും റിപ്പോർട്ടുകൾ സൂചിപ്പിക്കുന്നു. 2026 സെപ്റ്റംബറിൽ ഔദ്യോഗിക അവതരണം പ്രതീക്ഷിക്കുന്നു.
