ഗോവയിൽ എത്തുമ്പോൾ ബീച്ചുകൾ മാത്രമല്ല, ഈ സ്ഥലങ്ങൾ കൂടി കണ്ടിരിക്കണം
ഗോവ എന്നാൽ ബീച്ചുകൾ മാത്രമല്ല, അതിനപ്പുറം സാംസ്കാരികവും ചരിത്രപരവുമായ ഒട്ടേറെ വിസ്മയങ്ങൾ ഒളിപ്പിച്ചുവെച്ച ഒരിടം കൂടിയാണ്. ദൂദ്‌സാഗർ വെള്ളച്ചാട്ടം മുതൽ ബസലിക്ക ഓഫ് ബോം ജീസസ് വരെ, തീരങ്ങൾക്കപ്പുറമുള്ള മനോഹരമായ സ്ഥലങ്ങൾ പരിചയപ്പെടാം.
ഈ സ്ഥലങ്ങൾ കണ്ടാൽ ഞെട്ടും
ഗോവ എന്ന് കേൾക്കുമ്പോൾ മനസ്സിൽ വരുന്നത് കടലും മണൽത്തീരവും അടിച്ചുപൊളി പാർട്ടികളുമാണ്. എന്നാൽ ഗോവ അതല്ല, അതിനുമപ്പുറം ഒരുപാട് കാഴ്ചകളുണ്ട്. മനോഹരമായ ബീച്ചുകൾക്കും ആവേശകരമായ നൈറ്റ് ലൈഫിനും അപ്പുറം പ്രകൃതിയുടെയും സംസ്കാരത്തിൻ്റെയും ചരിത്രത്തിൻ്റെയും ഒരു വലിയ ലോകം ഗോവയിലുണ്ട്. തീരം വിട്ട് യാത്ര ചെയ്യാൻ തയ്യാറുള്ളവർക്കായി ഗോവ ഒരുപാട് കാര്യങ്ങൾ കരുതിവെച്ചിട്ടുണ്ട്. ശാന്തമായ ദ്വീപുകൾ, ഊർജ്ജസ്വലമായ സാംസ്കാരിക തെരുവുകൾ, നൂറ്റാണ്ടുകൾ പഴക്കമുള്ള ക്ഷേത്രങ്ങൾ, കൂറ്റൻ വെള്ളച്ചാട്ടങ്ങൾ എന്നിങ്ങനെ ആ പട്ടിക നീളുന്നു.
നിങ്ങൾ പ്രകൃതിയെ സ്നേഹിക്കുന്ന ആളായാലും, ചരിത്രത്തിൽ താല്പര്യമുള്ളയാളായാലും, സാഹസികത ഇഷ്ടപ്പെടുന്നയാളായാലും ഗോവയുടെ ഈ വൈവിധ്യമാർന്ന സൗന്ദര്യം നിങ്ങളെ ആകർഷിക്കും. ഗോവയിലെ സംസ്കാരവും ചരിത്രവും പ്രകൃതിഭംഗിയും ഒരുപോലെ സമ്മേളിക്കുന്ന, ജീവിതത്തിൽ ഒരിക്കലും മറക്കാനാവാത്ത അനുഭവങ്ങൾ സമ്മാനിക്കുന്ന സ്ഥലങ്ങൾ പരിചയപ്പെടാം.
ബസലിക്ക ഓഫ് ബോം ജീസസ്
യുനെസ്കോയുടെ ലോക പൈതൃക പട്ടികയിൽ ഇടംപിടിച്ച ഈ പള്ളി ഇന്ത്യയിലെ ഏറ്റവും ആദരണീയമായ ദേവാലയങ്ങളിലൊന്നാണ്. 1594ലാണ് ഇത് നിർമ്മിച്ചത്. ബറോക്ക് വാസ്തുവിദ്യയുടെ ഉത്തമ ഉദാഹരണമായ ഈ പള്ളിയിലാണ് പ്രശസ്ത മിഷനറി വിശുദ്ധ ഫ്രാൻസിസ് സേവ്യറിൻ്റെ ഭൗതികാവശിഷ്ടം സൂക്ഷിച്ചിരിക്കുന്നത്. ഓൾഡ് ഗോവയിൽ സ്ഥിതി ചെയ്യുന്ന ഈ ബസലിക്ക, സംസ്ഥാനത്തിൻ്റെ സമ്പന്നമായ ക്രിസ്ത്യൻ, കൊളോണിയൽ ഭൂതകാലത്തിലേക്ക് സഞ്ചാരികൾക്ക് ഒരു നേർക്കാഴ്ച നൽകുന്നു.
ഫോണ്ടെയ്ൻഹാസ് ലാറ്റിൻ ക്വാർട്ടർ
ഫോണ്ടെയ്ൻഹാസിലെ വളഞ്ഞുപുളഞ്ഞ തെരുവുകളിലൂടെ നടക്കുമ്പോൾ നമ്മൾ പഴയ പോർച്ചുഗലിൽ എത്തിയതുപോലെ തോന്നും. വർണങ്ങൾ വാരിപ്പൂശിയ വീടുകളും ഇരുമ്പ് ബാൽക്കണികളും പഴയകാലത്തെ തെരുവുവിളക്കുകളും ഈ പ്രദേശത്തിന് കാലാതീതമായ ഒരു സൗന്ദര്യം നൽകുന്നു. ഫോട്ടോഗ്രാഫർമാരുടെയും എഴുത്തുകാരുടെയും ചിത്രകാരന്മാരുടെയും കേന്ദ്രമായ ഫോണ്ടെയ്ൻഹാസ്, ഹെറിറ്റേജ് ഹോംസ്റ്റേകൾക്കും ആർട്ട് ഗാലറികൾക്കും ചെറിയ കഫേകൾക്കും പേരുകേട്ടതാണ്. സമീപത്തുള്ള ചർച്ച് ഓഫ് ഔർ ലേഡി ഓഫ് ഇമ്മാക്കുലേറ്റ് കൺസെപ്ഷൻ ഈ പ്രദേശത്തിൻ്റെ കൊളോണിയൽ ഭംഗി വർധിപ്പിക്കുന്നു.
സെ കത്തീഡ്രൽ
ഓൾഡ് ഗോവയിലെ മറ്റൊരു രത്നമാണ് സെ കത്തീഡ്രൽ. ഏഷ്യയിലെ ഏറ്റവും വലിയ പള്ളികളിലൊന്നാണിത്. 1562ൽ പണി പൂർത്തിയാക്കിയ ഈ പള്ളി, പോർച്ചുഗീസ്-ഗോഥിക് വാസ്തുവിദ്യയുടെ പ്രതീകമാണ്. അലക്സാണ്ട്രിയയിലെ വിശുദ്ധ കാതറിനാണ് ഇത് സമർപ്പിച്ചിരിക്കുന്നത്. ചർച്ച് ഓഫ് സെൻ്റ് ഫ്രാൻസിസ് ഓഫ് അസീസി, ബസലിക്ക ഓഫ് ബോം ജീസസ് തുടങ്ങിയ മറ്റ് പ്രശസ്തമായ സ്ഥലങ്ങൾക്ക് സമീപത്തായതിനാൽ ഗോവയുടെ കൊളോണിയൽ ചരിത്രത്തിലൂടെയുള്ള ചരിത്രപരമായ നടത്തത്തിന് ഈ പ്രദേശം അനുയോജ്യമാണ്.
ദൂദ്‌സാഗർ വെള്ളച്ചാട്ടം
'പാലിൻ്റെ കടൽ' എന്നർത്ഥം വരുന്ന ദൂദ്‌സാഗർ, ഇന്ത്യയിലെ ഏറ്റവും ഉയരമുള്ളതും മനോഹരവുമായ വെള്ളച്ചാട്ടങ്ങളിലൊന്നാണ്. 300 മീറ്ററിലധികം ഉയരത്തിൽ നിന്നാണ് ഇത് താഴേക്ക് പതിക്കുന്നത്. ഗോവ-കർണാടക അതിർത്തിയിൽ ഭഗവാൻ മഹാവീർ വന്യജീവി സങ്കേതത്തിൻ്റെ ഭാഗമായാണ് ഈ വെള്ളച്ചാട്ടം സ്ഥിതി ചെയ്യുന്നത്. പശ്ചിമഘട്ടത്തിലൂടെ ട്രെക്ക് ചെയ്തും ഫോറസ്റ്റ് ജീപ്പ് സഫാരി നടത്തിയും ട്രെയിൻ യാത്രയിലൂടെയും ഇവിടേക്ക് എത്തുന്നത് തന്നെ ഒരു സാഹസിക അനുഭവമാണ്. പച്ചപ്പ് നിറഞ്ഞ പ്രകൃതിക്ക് നടുവിലൂടെ ആർത്തലച്ച് ഒഴുകുന്ന ഈ വെള്ളച്ചാട്ടം ഗോവയിലെ ഏറ്റവും മനോഹരമായ പ്രകൃതിദൃശ്യങ്ങളിൽ ഒന്നാണ്.
