തമാശ നിറഞ്ഞ കാർട്ടൂണുകളിലൂടെയും മനോഹരമായ ചിത്രങ്ങളിലൂടെയും ഇന്ത്യയുടെയും ഗോവയുടെയും തനത് ഭാവം ഒപ്പിയെടുത്ത കലാകാരനാണ് മരിയോ മിറാൻഡ. ഗോവയിലെ ഗാലറികളിലും ചുവർചിത്രങ്ങളിലും അദ്ദേഹത്തിന്റെ ഓർമ്മകൾ ഇന്നും ജീവിക്കുന്നു.
ഗോവ എന്ന് കേൾക്കുമ്പോൾ ബീച്ചുകളും ആഘോഷങ്ങളുമാണ് ഓർമ്മ വരിക. എന്നാൽ ഇന്ത്യയിലെ ഏറ്റവും പ്രശസ്തനായ ചിത്രകാരന്മാരിൽ ഒരാളായ ഗോവയുടെ സ്വന്തം മരിയോ മിറാൻഡയുടെ പേരും ഈ നാടുമായി അത്രയേറെ ചേർന്നുനിൽക്കുന്നുണ്ട്.
ആരായിരുന്നു മരിയോ മിറാൻഡ?
1926ൽ ദാമനിൽ ജനിച്ച് ഗോവയിൽ വളർന്ന മരിയോ മിറാൻഡ, ഇന്ത്യയിലെ പ്രമുഖ കാർട്ടൂണിസ്റ്റും ചിത്രകാരനുമായിരുന്നു. സാധാരണക്കാരുടെ ജീവിതം, ഓഫീസിലെ തിരക്കുകൾ, നാട്ടിൻപുറത്തെ ബാറുകൾ, ഗോവൻ സംഗീതജ്ഞർ എന്നിങ്ങനെ ഇന്ത്യയിലെ ദൈനംദിന ജീവിതം തമാശയും യാഥാർത്ഥ്യവും കലർത്തി അദ്ദേഹം വരച്ചു. ടൈംസ് ഓഫ് ഇന്ത്യ, ദി ഇക്കണോമിക് ടൈംസ്, ഇല്ലസ്ട്രേറ്റഡ് വീക്ക്ലി തുടങ്ങിയ പ്രമുഖ പ്രസിദ്ധീകരണങ്ങളിലും നിരവധി വിദേശ മാഗസിനുകളിലും അദ്ദേഹത്തിന്റെ കാർട്ടൂണുകൾ പ്രസിദ്ധീകരിച്ചിട്ടുണ്ട്.
Related Articles
മരിയോ മിറാൻഡയ്ക്ക് ലഭിച്ച പ്രധാന പുരസ്കാരങ്ങൾ
ഇന്ത്യൻ കലയ്ക്കും കാർട്ടൂണിനും നൽകിയ സംഭാവനകൾക്ക് ദേശീയവും അന്തർദേശീയവുമായ നിരവധി പുരസ്കാരങ്ങൾ അദ്ദേഹത്തെ തേടിയെത്തി. 1988ൽ സാഹിത്യത്തിനും വിദ്യാഭ്യാസത്തിനും നൽകിയ സംഭാവനകൾക്ക് പത്മശ്രീ ലഭിച്ചു. 2012ൽ, മരണാനന്തരം, ഇന്ത്യയിലെ മൂന്നാമത്തെ വലിയ സിവിലിയൻ ബഹുമതിയായ പത്മഭൂഷൺ നൽകി രാജ്യം അദ്ദേഹത്തെ ആദരിച്ചു. ലോക കാർട്ടൂണിങ്ങിനും ദൃശ്യകലയ്ക്കും നൽകിയ സംഭാവനകൾക്ക് പോർച്ചുഗീസ് സംഘടനകളിൽ നിന്നും അന്താരാഷ്ട്ര തലത്തിലും അംഗീകാരങ്ങൾ ലഭിച്ചു.
സാംസ്കാരിക പൈതൃകം
ഇന്ത്യയിലെ ഹോട്ടലുകൾ, റെസ്റ്റോറന്റുകൾ, എയർപോർട്ടുകൾ, സർക്കാർ സ്ഥാപനങ്ങൾ എന്നിവയ്ക്കെല്ലാം വേണ്ടി അദ്ദേഹത്തിന്റെ ചിത്രങ്ങൾ ഉപയോഗിച്ചിട്ടുണ്ട്.
എന്തുകൊണ്ടാണ് മരിയോ മിറാൻഡ ഗോവയുടെ പര്യായമായത്?
ലോകം മുഴുവൻ അറിയപ്പെട്ടപ്പോഴും, മിറാൻഡയുടെ പ്രചോദനത്തിന്റെ ഉറവിടം ഗോവയായിരുന്നു. ഗോവൻ ഗ്രാമീണ ജീവിതം, അവിടുത്തെ ബാറുകൾ, പള്ളികൾ, സംഗീതജ്ഞർ, മാർക്കറ്റുകൾ എന്നിവയെല്ലാം സ്നേഹവും നർമ്മവും ചാലിച്ച് അദ്ദേഹം വരച്ചു. അദ്ദേഹത്തിന്റെ ചിത്രങ്ങൾ ഇന്ന് ഗോവയുടെ പഴയകാല സംസ്കാരത്തിന്റെയും ജീവിതശൈലിയുടെയും ഒരു നേർക്കാഴ്ചയാണ്.
ഗോവയിൽ മരിയോ മിറാൻഡയുടെ ചിത്രങ്ങൾ എവിടെ കാണാം?
1. മരിയോ ഗാലറി - കലൻഗുട്ട്
അദ്ദേഹത്തിന്റെ കുടുംബവീട്ടിലാണ് മരിയോ ഗാലറി പ്രവർത്തിക്കുന്നത്. ഇവിടെ അദ്ദേഹത്തിന്റെ പ്രശസ്തമായ ചിത്രങ്ങളുടെ പ്രിന്റുകൾ, പുസ്തകങ്ങൾ, സുവനീറുകൾ എന്നിവയെല്ലാം കാണാം.
2. ഫൊണ്ടെയ്ൻഹാസ്, പനാജി
പനാജിയിലെ വർണ്ണാഭമായ ലാറ്റിൻ ക്വാർട്ടറായ ഫൊണ്ടെയ്ൻഹാസിലെ പൊതു ഇടങ്ങളിലും ചുവരുകളിലും മരിയോ മിറാൻഡയുടെ ചിത്രങ്ങളിൽനിന്ന് പ്രചോദനം ഉൾക്കൊണ്ട കലാരൂപങ്ങൾ കാണാം. നമ്മുടെ ഫോർട്ട് കൊച്ചിയിലെ പോലൊരു പൈതൃക തെരുവാണിത്.
3. പനാജിയിലെ ആർട്ട് എക്സിബിഷനുകൾ
പനാജിയിലെ പല ഗാലറികളും അദ്ദേഹത്തിന്റെ ചിത്രങ്ങളുടെ പ്രദർശനങ്ങൾ സംഘടിപ്പിക്കാറുണ്ട്, പ്രത്യേകിച്ച് സാംസ്കാരിക ഉത്സവങ്ങളുടെ സമയത്ത്.
4. പൈതൃക കഫേകളും റെസ്റ്റോറന്റുകളും
ഗോവയിലെ പല പഴയ കഫേകളിലും റെസ്റ്റോറന്റുകളിലും അലങ്കാരമായി മരിയോ മിറാൻഡയുടെ ഫ്രെയിം ചെയ്ത ചിത്രങ്ങളും ചുവർചിത്രങ്ങളും കാണാൻ സാധിക്കും.
ഗോവയുടെ ആത്മാവ് മരിയോ മിറാൻഡയെപ്പോലെ ഭംഗിയായി പകർത്തിയ ചുരുക്കം ചില കലാകാരന്മാരേയുള്ളൂ. അദ്ദേഹത്തിന്റെ പുരസ്കാരങ്ങൾ നേടിയ സൃഷ്ടികൾ ഇന്നും കലാസ്വാദകരെയും വിനോദസഞ്ചാരികളെയും ഒരുപോലെ ആകർഷിക്കുന്നു. ഗാലറികളിലൂടെയോ ചുവർചിത്രങ്ങളിലൂടെയോ കഫേകളിലെ അലങ്കാരങ്ങളിലൂടെയോ ആകട്ടെ, ഗോവ സന്ദർശിക്കുമ്പോൾ തീർച്ചയായും കണ്ടിരിക്കേണ്ട ഒന്നാണ് മരിയോ മിറാൻഡയുടെ കലാലോകം.
