ഒരുമാസം മുൻപ് വിവാഹിതയായ അനിതയും ഭർത്താവ് സുരേഷും ക്ഷേത്രദർശനത്തിനായാണ് കഴുകമലൈയിലെത്തിയത്. പ്രധാനക്ഷേത്രത്തിലെ ദർശനം കഴിഞ്ഞശേഷം നവദമ്പതിമാർ സമീപത്തെ മലമുകളിലെ മറ്റൊരു ക്ഷേത്രത്തിലേക്ക് പോയി. ഇവിടെവെച്ച് കുരങ്ങുകൾക്ക് പഴങ്ങൾ നൽകി.
തൂത്തുക്കുടി: കുരങ്ങുകൾ കൂട്ടത്തോടെ വളഞ്ഞതിന് പിന്നാലെ പരിഭ്രാന്തയായ യുവതി മലമുകളിൽനിന്ന് വീണ് മരിച്ചു. തമിഴ്നാട് തൂത്തുക്കുടി സൗത്ത് തിട്ടാങ്കുളം സ്വദേശി അനിത(24)യാണ് മരിച്ചത്. ശനിയാഴ്ച തൂത്തുക്കുടിയിലെ കഴുകുമലൈയിലെ ക്ഷേത്രപരിസരത്താണ് സംഭവം.
ഒരുമാസം മുൻപ് വിവാഹിതരായ അനിതയും ഭർത്താവ് സുരേഷും ക്ഷേത്രദർശനത്തിനായാണ് കഴുകുമലൈയിലെത്തിയത്. പ്രധാനക്ഷേത്രത്തിലെ ദർശനം കഴിഞ്ഞശേഷം നവദമ്പതിമാർ സമീപത്തെ മലമുകളിലെ മറ്റൊരു ക്ഷേത്രത്തിലേക്ക് പോയി. ഇവിടെവെച്ച് കുരങ്ങുകൾക്ക് പഴങ്ങൾ നൽകി. ഇതിനിടെ കുരങ്ങുകൾ കൂട്ടത്തോടെയെത്തി ദമ്പതിമാരെ വളയുകയും പരിഭ്രാന്തയായ യുവതി കാൽതെന്നി മലമുകളിൽനിന്ന് താഴേക്ക് വീഴുകയുമായിരുന്നെന്ന് പോലീസ് പറഞ്ഞു. ഭർത്താവിന്റെ കണ്മുന്നിലായിരുന്നു അപകടം. പിന്നാലെ ഭർത്താവ് സുരേഷ് അനിതയ്ക്കരികെ ഓടിയെത്തിയെങ്കിലും മരണം സംഭവിച്ചിരുന്നു. ഭാര്യയുടെ മൃതദേഹത്തിനരികെയിരുന്ന് പൊട്ടിക്കരയുന്ന സുരേഷിന്റെ ദൃശ്യങ്ങളും സാമൂഹികമാധ്യമങ്ങളിൽ പ്രചരിക്കുന്നുന്നുണ്ട്.
വിദേശത്ത് ജോലിചെയ്യുന്ന സുരേഷും അനിതയും ഒരുമാസം മുൻപാണ് വിവാഹിതരായത്. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചു. മൃതദേഹം പോസ്റ്റ്മോർട്ടത്തിനായി ആശുപത്രിയിലേക്ക് മാറ്റി.
