തൃപ്പൂണിത്തുറ ശ്രീ പൂർണത്രയീശ ക്ഷേത്രത്തിൽ പേര് വെളിപ്പെടുത്താത്ത ഒരു ഭക്തൻ നവരത്നങ്ങൾ പതിച്ച് സ്വർണം കെട്ടിയ ശംഖ് വഴിപാടായി സമർപ്പിച്ചു. ഉത്രം തിരുനാൾ ദിനത്തിൽ സമർപ്പിച്ച ഈ ശംഖും വെള്ളിയിൽ തീർത്ത പ്രത്യേക കാലും ഇനി മുതൽ ഭഗവാന്റെ നിത്യ പൂജകൾക്കായി ഉപയോഗിക്കും.
കൊച്ചി: തൃപ്പൂണിത്തുറ ശ്രീ പൂർണത്രയീശ ക്ഷേത്രത്തിൽ വഴിപാടായി സ്വർണം കെട്ടിയ ശംഖ് സമർപ്പിച്ചു. പേര് വെളിപ്പെടുത്താൻ ആഗ്രഹിക്കാത്ത ഭക്തനാണ് ഈ വഴിപാട് നടത്തിയത്. നവരത്നങ്ങൾ പതിച്ചും സ്വർണം കെട്ടിയും അലങ്കരിച്ചതാണ് ശംഖ്. ഉത്രം തിരുനാൾ ദിനത്തിൽ ക്ഷേത്ര നടയ്ക്കലാണ് ശംഖ് സമർപ്പിച്ചത്. ഈ ശംഖ് ഇനി മുതൽ ശ്രീകോവിലിൽ ഭഗവാന്റെ നിത്യ പൂജകളിൽ ഉപയോഗിക്കുമെന്ന് ക്ഷേത്രം അധികൃതർ പറഞ്ഞു.
ശംഖ് വയ്ക്കുന്നതിനായി ഭക്തൻ വെള്ളിയിൽ നിർമിച്ച പ്രത്യേക കാലും ഇതോടൊപ്പം സമർപ്പിച്ചിട്ടുണ്ട്. ക്ഷേത്രത്തിന്റെ മുൻ വശത്ത് പ്രവർത്തിക്കുന്ന സ്ഥാപനത്തിൽ സ്വർണ പണികൾ നടത്തുന്ന ടികെ വെങ്കിടേഷിന്റെയും മകൻ ശ്രീകുമാറിന്റെയും നേതൃത്വത്തിലാണ് ശംഖിൽ സ്വർണം കെട്ടുകയും വെള്ളി കൊണ്ട് കാലും തയ്യാറാക്കുകയും ചെയ്തത്. ശംഖിന്റെ അലങ്കാരത്തിനായി എട്ട് പവൻ സ്വർണവും നവരത്നങ്ങളും ഉപയോഗിച്ചതായും വെങ്കിടേഷും ശ്രീകുമാറും പറഞ്ഞു.
