പച്ചക്കറികൾ വെറുതെ പൈപ്പ് വെള്ളത്തിൽ കഴുകിയതുകൊണ്ട് മാത്രം കീടനാശിനികളെ പൂർണ്ണമായും ഇല്ലാതാക്കാൻ സാധിക്കുകയില്ല.
പച്ചക്കറികൾ കഴിക്കുന്നത് ആരോഗ്യത്തിന് ഏറെ നല്ലതാണെങ്കിലും, അവയുടെ പുറംതോലിൽ തളിക്കുന്ന കീടനാശിനികൾ നമ്മുടെ ശരീരത്തിന് ദോഷകരമായി ബാധിക്കാം. വിളവെടുക്കുമ്പോഴും കൈകാര്യം ചെയ്യുമ്പോഴും പച്ചക്കറികളിലും പഴങ്ങളിലും മലിനീകരണം ഉണ്ടാവാൻ സാധ്യത കൂടുതലാണ്. പച്ചക്കറികൾ വെറുതെ പൈപ്പ് വെള്ളത്തിൽ കഴുകിയതുകൊണ്ട് മാത്രം ഈ കീടനാശിനികളെ പൂർണ്ണമായും ഇല്ലാതാക്കാൻ സാധിക്കുകയില്ല. അതുകൊണ്ട് തന്നെ പാചകം ചെയ്യുന്നതിന് മുൻപ് ഇവ ശരിയായ രീതിയിൽ വൃത്തിയാക്കേണ്ടത് പ്രധാനമാണ്. പച്ചക്കറികളിലെ കീടനാശിനികൾ പ്രകൃതിദത്തമായി നീക്കം ചെയ്യാൻ ഇങ്ങനെ ചെയ്യൂ.
1. വെള്ളത്തിൽ നന്നായി കുതിർത്തു വെക്കുക
പച്ചക്കറികൾ വൃത്തിയാക്കാനുള്ള ഏറ്റവും ലളിതമായ മാർഗ്ഗമാണിത്. കടയിൽ നിന്ന് വാങ്ങുന്ന പച്ചക്കറികൾ ആദ്യം പൈപ്പ് വെള്ളത്തിൽ കാണിച്ച് മണ്ണും പൊടിയും കളയുക. അതിനുശേഷം ഒരു വലിയ പാത്രത്തിൽ വെള്ളമെടുത്ത് 30 മിനിറ്റ് പച്ചക്കറികൾ അതിൽ മുക്കിവെയ്ക്കാം. ഇത് കീടനാശിനികളുടെ അംശവും പൊടിപടലങ്ങളെയും നീക്കാൻ സഹായിക്കും. ചീര, മല്ലിയില തുടങ്ങിയ ഇലക്കറികൾ വെള്ളത്തിൽ വെച്ച് കൈകൊണ്ട് നന്നായി ഇളക്കി കഴുകണം. അതിനുശേഷം വീണ്ടും ശുദ്ധമായ വെള്ളത്തിൽ ഒന്നുകൂടി കഴുകിയെടുക്കുക.
2. വിനാഗിരി ചേർത്ത വെള്ളം
പച്ചക്കറികളുടെ പുറമെയുള്ള കീടനാശിനികളെ ഇല്ലാതാക്കാൻ വിനാഗിരിക്ക് കഴിയും. ഒരു പാത്രത്തിൽ വെള്ളമെടുത്തതിന് ശേഷം അതിലേക്ക് വിനാഗിരി ചേർക്കാം. അതുകഴിഞ്ഞ് പച്ചക്കറികൾ അതിൽ മുക്കിവെയ്ക്കാം. ശേഷം പതുക്കെ കൈകൊണ്ട് തിരുമ്മി ശുദ്ധമായ വെള്ളത്തിൽ നന്നായി കഴുകിയെടുത്താൽ മതി.
Related Articles
3. ഉപ്പുവെള്ളം
കീടനാശിനികളെ വേർപെടുത്താൻ ഉപ്പുവെള്ളത്തിന് പ്രത്യേക കഴിവുണ്ട്. വെള്ളത്തിൽ ഉപ്പ് കലർത്തിയതിന് ശേഷം അതിലേക്ക് പച്ചക്കറികൾ മുക്കിവെക്കണം. അതിനുശേഷം കൈകൊണ്ട് പതുക്കെ ഉരസി നല്ല വെള്ളത്തിൽ കഴുകിയെടുത്താൽ മതി.
4. തൊലി കളയാം
പല പച്ചക്കറികളിലും കീടനാശിനികൾ അടിഞ്ഞുകൂടുന്നത് അവയുടെ പുറംതോലിലാണ്. ക്യാരറ്റ്, വെള്ളരിക്ക, ചുരയ്ക്ക, ആപ്പിൾ എന്നിവയുടെ തൊലി ചെത്തിക്കളയുന്നത് കീടനാശിനികൾ ഉള്ളിൽച്ചെല്ലുന്നത് വലിയൊരു പരിധി വരെ തടയും.
5. ബേക്കിംഗ് സോഡ ഉപയോഗിക്കാം
കീടനാശിനികളിലെ കടുത്ത രാസവസ്തുക്കളെ തകർക്കാൻ ബേക്കിംഗ് സോഡാ സഹായിക്കും. ഒരു പാത്രത്തിൽ വെള്ളമെടുത്തതിന് ശേഷം അതിലേക്ക് അല്പം ബേക്കിംഗ് സോഡ ചേർക്കാം. ശേഷം പച്ചക്കറികൾ ഇതിൽ മുക്കിവെയ്ക്കാം. അതുകഴിഞ്ഞ് നന്നായി തിരുമ്മി നല്ല വെള്ളത്തിൽ കഴുകിയെടുത്താൽ മതി.
