പഴയ ആൻഡ്രോയ്ഡ്, ഐഒഎസ് പതിപ്പുകൾ ഉപയോഗിക്കുന്ന ഫോണുകളിൽ വാട്‍സാപ്പ് പ്രവേശനം തടയാനുള്ള പുതിയ സുരക്ഷാ സംവിധാനം കമ്പനി പരീക്ഷിക്കുന്നു. സൈബർ ആക്രമണങ്ങളിൽ നിന്ന് ഉപയോക്താക്കളെ സംരക്ഷിക്കുന്നതിനായി ഫോൺ സോഫ്റ്റ്‌വെയർ അപ്‌ഡേറ്റ് ചെയ്താൽ മാത്രമേ ഇനി വാട്‍സാപ്പ് ഉപയോഗിക്കാൻ സാധിക്കൂ.
പഴയ പതിപ്പിലുള്ള ആൻഡ്രോ, ഐഒഎസ് സോഫ്റ്റ്‌വെയറുകൾ ഉപയോഗിക്കുന്ന ഫോണുകളിൽ വാട്‍സാപ്പിലേക്ക് പ്രവേശിക്കുന്നത് തടയാനുള്ള സുരക്ഷാ നടപടി കമ്പനി പരീക്ഷിക്കുന്നതായി റിപ്പോർട്ട്. ഫോൺ സോഫ്റ്റ്‌വെയർ ഏറ്റവും പുതിയ പതിപ്പിലേക്ക് പുതുക്കിയതിന് ശേഷം മാത്രമേ വാട്‍സാആപ്പ് ഉപയോഗിക്കാൻ കഴിയൂ എന്ന രീതിയിലുള്ള മാറ്റമാണ് പരീക്ഷിക്കുന്നത്. പഴയ സോഫ്റ്റ്‌വെയറുകളിലെ സുരക്ഷാ പോരായ്‍മകൾ മുതലെടുത്തുള്ള സൈബർ ആക്രമണങ്ങളിൽ നിന്ന് ഉപയോക്താക്കളെ സംരക്ഷിക്കുകയാണ് നീക്കത്തിന് പിന്നിലെ ലക്ഷ്യമെന്നാണ് റിപ്പോർട്ട്.
ലോഗിൻ ചെയ്യണമെങ്കിൽ ആദ്യം സോഫ്റ്റ്‌വെയർ പുതുക്കണം
വാട്‍സാപ്പ് സംബന്ധിച്ച പുതിയ മാറ്റങ്ങൾ റിപ്പോർട്ട് ചെയ്യുന്ന വാബീറ്റാഇൻഫോയുടെ റിപ്പോർട്ട് പ്രകാരം, ചില ആൻഡ്രോയ്ഡ്, ഐഒഎസ് ഉപയോക്താക്കളുടെ ഫോണുകളിൽ പുതിയ മുന്നറിയിപ്പ് സന്ദേശം പ്രത്യക്ഷപ്പെട്ടിട്ടുണ്ട്. വാട്‍സാപ്പിൽ ലോഗിൻ ചെയ്യുന്നതിന് മുമ്പ് ഫോണിന്റെ ഓപ്പറേറ്റിങ് സിസ്റ്റം പുതുക്കണമെന്നാണ് സന്ദേശത്തിൽ ആവശ്യപ്പെടുന്നത്. ഫോണിന്റെ സെറ്റിംഗ്‍സിൽ നിന്ന് നിലവിലുള്ള സോഫ്റ്റ്‌വെയർ പതിപ്പ് പരിശോധിക്കാനും പുതിയ പതിപ്പ് ലഭ്യമാണെങ്കിൽ അത് ഇൻസ്റ്റാൾ ചെയ്യാനും നിർദേശമുണ്ട്. പുതിയ അപ്‌ഡേറ്റ് ഒഴിവാക്കി വാട്സ്ആപ്പിലേക്ക് പ്രവേശിക്കാനുള്ള സൗകര്യം ബാധിക്കപ്പെട്ട ഉപയോക്താക്കൾക്ക് ലഭിക്കില്ലെന്നാണ് റിപ്പോർട്ട്. അതായത്, ആദ്യം ഫോൺ സോഫ്റ്റ്‌വെയർ പുതുക്കിയതിന് ശേഷമേ വാട്സ്ആപ്പ് ഉപയോഗിക്കാൻ സാധിക്കൂ.
പുതിയ വാട്‍സാപ്പ് പതിപ്പ് ഡൗൺലോഡ് ചെയ്യേണ്ടതില്ല
ഇതിനായി വാട്‍സാപ്പിന്റെ പുതിയ പതിപ്പ് പ്രത്യേകം ഡൗൺലോഡ് ചെയ്യേണ്ടതില്ലെന്നാണ് വിവരം. സെർവർ ഭാഗത്തുനിന്നുള്ള മാറ്റത്തിലൂടെയാണ് പുതിയ നിയന്ത്രണം സജീവമാക്കുന്നത്. നിലവിൽ തിരഞ്ഞെടുത്ത ചില ആൻഡ്രോയ്ഡ്, ഐഒഎസ് അക്കൗണ്ടുകളിൽ മാത്രമാണ് പരീക്ഷണം നടക്കുന്നത്. എന്നാൽ ഏതൊക്കെ സോഫ്റ്റ്‌വെയർ പതിപ്പുകളാണ് ഈ നിയന്ത്രണത്തിന് വിധേയമാകുകയെന്ന് വാട്‍സാപ്പ് ഇതുവരെ വ്യക്തമാക്കിയിട്ടില്ല.
Related Articles
പഴയ സോഫ്റ്റ്‌വെയറുകൾ സുരക്ഷാ ഭീഷണിയാകാം
പഴയ ആൻഡ്രോയ്ഡ്, ഐഒഎസ് പതിപ്പുകളിൽ ഏറ്റവും പുതിയ സുരക്ഷാ പരിഹാരങ്ങൾ ലഭ്യമാകാത്തതിനാൽ സൈബർ ഭീഷണികൾക്ക് ഫോണുകൾ കൂടുതൽ വിധേയമാകാനുള്ള സാധ്യതയുണ്ട്. ഈ സാഹചര്യത്തിലാണ് ഉപയോക്താക്കളെ പുതിയ സോഫ്റ്റ്‌വെയർ പതിപ്പുകളിലേക്ക് മാറാൻ പ്രേരിപ്പിക്കുന്നതിന്റെ ഭാഗമായി വാട്‍സാപ്പ് പുതിയ നിയന്ത്രണം പരീക്ഷിക്കുന്നതെന്നാണ് വിലയിരുത്തൽ.
അനൗദ്യോഗിക വാട്‍സാപ്പ് സേവനങ്ങൾക്കും മുന്നറിയിപ്പ്
അതേസമയം, അനൗദ്യോഗിക വാട്‍സാപ്പ് വെബ് സേവനങ്ങളുമായി അക്കൗണ്ട് ബന്ധിപ്പിക്കുന്ന ഉപയോക്താക്കൾക്കായി മറ്റൊരു മുന്നറിയിപ്പും കമ്പനി പരീക്ഷിക്കുന്നതായി റിപ്പോർട്ടുണ്ട്. വാട്‍സാപ്പിലെ കണക്റ്റഡ് ഡിവൈസസ് എന്ന വിഭാഗത്തിൽ ഈ മുന്നറിയിപ്പ് പ്രത്യക്ഷപ്പെടാം. ഔദ്യോഗിക വാട്‍സാപ്പ് സേവനം ഉപയോഗിക്കണമെന്നാണ് ഇതിലൂടെ ഉപയോക്താക്കളോട് ആവശ്യപ്പെടുക.
കൂടുതൽ സുരക്ഷാ ഫീച്ചറുകളും വരുന്നു
അക്കൗണ്ട് സുരക്ഷ ശക്തമാക്കുന്നതിന്റെ ഭാഗമായി വാട്‍സാപ്പ് കൂടുതൽ ഫീച്ചറുകൾ പരീക്ഷിക്കുന്നതായും റിപ്പോർട്ടുകളുണ്ട്. തട്ടിപ്പ് മുന്നറിയിപ്പ്, നിയന്ത്രിത ചാറ്റുകൾ തുടങ്ങിയ സംവിധാനങ്ങളും കമ്പനി വികസിപ്പിക്കുന്നതായി സൂചനയുണ്ട്. നിലവിൽ സോഫ്റ്റ്‌വെയർ പുതുക്കാതെ വാട്‍സാപ്പിൽ പ്രവേശിക്കുന്നത് തടയുന്ന സംവിധാനം പരിമിതമായ ഉപയോക്താക്കളിൽ മാത്രമാണ് പരീക്ഷിക്കുന്നത്. അതിനാൽ മുന്നറിയിപ്പ് ലഭിക്കാത്തവർക്ക് നിലവിൽ സാധാരണ രീതിയിൽ വാട്‍സാപ്പ് ഉപയോഗിക്കാൻ സാധിക്കും. ഏതൊക്കെ സോഫ്റ്റ്‌വെയർ പതിപ്പുകളെയാണ് നിയന്ത്രണം ബാധിക്കുക, എപ്പോൾ ഇത് എല്ലാ ഉപയോക്താക്കളിലേക്കും എത്തും തുടങ്ങിയ കാര്യങ്ങളിൽ വാട്‍സാപ്പ് ഔദ്യോഗിക സ്ഥിരീകരണം നൽകിയിട്ടില്ല.
