- Home
- Sports
- Cricket
- സൂപ്പര് ഹിറ്റുമായി ഉണ്ണി മുകുന്ദനും അര്ജ്ജുന് നന്ദകുമാറും, ക്ലൈമാക്സില് മഴയുടെ കളി, ചെന്നൈയെ വീഴ്ത്തി കേരള സ്ട്രൈക്കേഴ്സ് സിസിഎൽ സെമിയില്
സൂപ്പര് ഹിറ്റുമായി ഉണ്ണി മുകുന്ദനും അര്ജ്ജുന് നന്ദകുമാറും, ക്ലൈമാക്സില് മഴയുടെ കളി, ചെന്നൈയെ വീഴ്ത്തി കേരള സ്ട്രൈക്കേഴ്സ് സിസിഎൽ സെമിയില്
സെലിബ്രിറ്റി ക്രിക്കറ്റ് ലീഗിൽ മഴ വില്ലനായ മത്സരത്തിൽ, ചെന്നൈ കിംഗ്സിനെ ഡക്വർത്ത് ലൂയിസ് നിയമപ്രകാരം 10 റൺസിന് പരാജയപ്പെടുത്തി കേരള സ്ട്രൈക്കേഴ്സ് സെമി ഫൈനലിൽ പ്രവേശിച്ചു.
സ്ട്രൈക്കേഴ്സ് മെഗാ ഹിറ്റ്
സെലിബ്രിറ്റി ക്രിക്കറ്റ് ലീഗില് വേല്സ് ചെന്നൈ കിംഗ്സിനെ 10 റണ്സിന് തകര്ത്ത് കേരള സ്ട്രൈക്കേഴ്സ് സെമിയിലെത്തി. മഴ വില്ലനായ മത്സരത്തില് ഡക്വര്ത്ത് ലൂയിസ് നിയമപ്രകാരമായിരുന്നു കേരള സ്ട്രൈക്കേഴ്സിന്റെ ജയം. ആദ്യം ബാറ്റ് ചെയ്ത കേരള സ്ട്രൈക്കേഴ്സ് 17.4 ഓവറില് 165 റണ്സിന് ഓള് ഔട്ടായി.
ക്ലൈമാക്സില് വില്ലനായി ഡക്വര്ത്ത് ലൂയീസ്
15-ാം ഓവറില് ചെന്നൈ 112-6 നില്ക്കുമ്പോഴാണ് മഴ ചെന്നൈയുടെ വില്ലനായും കേരളത്തിന്റെ രക്ഷകനായും അവതരിച്ചത്. ഇതോടെ ചെന്നൈ കിംഗ്സിന്റെ വിജയലക്ഷ്യം 16 ഓവറില് 123 റണ്സായി പുനര്നിര്ണയിച്ചു. എന്നാല് മഴ മൂലം മത്സരം പുനരാരംഭിക്കാന് സാധ്യമാവാവാതെ വന്നതോടെ കേരള സ്ട്രൈക്കേഴ്സിനെ 10 റണ്സിന് വിജയികളായി പ്രഖ്യാപിക്കുകയായിരുന്നു. ടൂര്ണമെന്റില് രണ്ടാം ജയവുമായി കേരളം സെമിയിലേക്ക് മുന്നേറി.
കളി തിരിച്ചത് വിവേക് ഗോപന്
ചെന്നൈ ഇന്നിംഗ്സിലെ പന്ത്രണ്ടാം ഓവര് എറിഞ്ഞ വിവേക് ഗോപന് 62 റണ്സുമായി തകര്ത്തടിച്ച് ക്രീസില് നിന്ന വിക്രാന്ത് സന്തോഷിനെ പുറത്താക്കിയതിനൊപ്പം ഓവര് മെയ്ഡനാക്കിയത് മത്സരത്തിലെ നിര്ണായക വഴിത്തിരിവായി. ഇതോടെ 96-5ലേക്ക് വീണ ചെന്നൈയുടെ സ്കോറിംഗ് വേഗം കുത്തനെ ഇടിഞ്ഞു.
അരുണ് ബെന്നിയുടെ ഓവറുകള് നിര്ണായമായി
ചെന്നൈ ഇന്നിംഗ്സിലെ പതിനൊന്നാം ഓവറില് ആറ് റണ്സ് മാത്രം വഴങ്ങി ഹരിശങ്കറിന്റെ നിര്ണായക വിക്കറ്റെടുത്ത അരുണ് ബെന്നി പതിമൂന്നാം ഓവറില് ആദവ് കണ്ണദാസനെ കൂടി പുറത്താക്കി ചെന്നൈയ്ക്ക് പൂട്ടിട്ടു.
ഉണ്ണി മുകുന്ദന്റെ സൂപ്പര് ഹിറ്റ്
നേരത്തെ ആദ്യം ബാറ്റ് ചെയ്ത കേരള സ്ട്രൈക്കേഴ്സിനായി ക്യാപ്റ്റൻ ഉണ്ണി മുകുന്ദന് മികച്ച പ്രകടനം പുറത്തെടുത്തു. ഓപ്പണിംഗ് വിക്കറ്റില് അര്ജ്ജുന് നന്ദകുമാറിനൊപ്പം 46 റണ്സ് കൂട്ടിച്ചേര്ത്ത ഉണ്ണി അഞ്ചാം ഓവറില് 19 പന്തില് 27 റണ്സെടുത്ത് പുറത്തായി.
മധ്യനിര കാത്ത അര്ജ്ജുന് നന്ദകുമാര്
കൂട്ടത്തകര്ച്ചയിലും തകര്ത്തടിച്ച അര്ജ്ജുന് നന്ദകുമാറും(33 പന്തില് 49) പ്രശാന്ത് അലക്സാണ്ടറും(19 പന്തില് 21) ചേര്ന്ന് പന്ത്രണ്ടാം ഓവറില് സ്ട്രൈക്കേഴ്സിനെ 100 കടത്തി. എക്സ്ട്രാസും ഈ സമയം കേരളത്തെ തുണച്ചതോടെ 9-11 ഓവറുകളില് കേരളം വിക്കറ്റ് നഷ്ടപ്പെടുത്താതെ 29 റണ്സ് കൂടി കൂട്ടിച്ചേര്ത്തു.
അവസാനം തകര്ത്തടിച്ച് മദന് മോഹനും
അവസാന ഓവറുകളില് സ്കോറുയര്ത്താനുള്ള ശ്രമത്തില് അര്ജ്ജുന് നന്ദകുമാര് റണ്ണൗട്ടായെങ്കിലും മദന് മോഹന്റെ(13 പന്തില് 27) കൂറ്റനടികള് കേരള സ്ട്രൈക്കേഴ്സിനെ പൊരുതാവുന്ന സ്കോറിലെത്തിച്ചു. ഒടുവില് പതിനേഴാം ഓവറിലെ ഇരട്ട പ്രഹരത്തിലൂടെ ആദവ് കണ്ണദാസന് കേരളത്തിന്റെ സ്കോര് 165ല് പിടിച്ചുനിര്ത്തി.
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!
