'ബീച്ചുകളുടെ റാണി'; ഗോവൻ യാത്രയിൽ ഈ ബീച്ച് ഒരിക്കലും ഒഴിവാക്കരുത്
ഗോവ യാത്ര പ്ലാൻ ചെയ്യുകയാണോ? എങ്കിൽ 'ബീച്ചുകളുടെ റാണി' എന്നറിയപ്പെടുന്ന കലൻഗുട്ട് ബീച്ച് നിർബന്ധമായും കണ്ടിരിക്കണം. വാട്ടർ സ്പോർട്സ് മുതൽ നൈറ്റ് ലൈഫും ഷോപ്പിങ്ങും വരെ, എല്ലാത്തരം യാത്രക്കാർക്കും വേണ്ടതെല്ലാം ഇവിടെയുണ്ട്.
കലൻഗുട്ടിലേക്ക് എത്തേണ്ട വഴി
ഗോവയുടെ തലസ്ഥാനമായ പനാജിയിൽനിന്ന് 11 കിലോമീറ്റർ ദൂരമേയുള്ളൂ കലൻഗുട്ടിലേക്ക്. ഗോവ അന്താരാഷ്ട്ര വിമാനത്താവളത്തിൽനിന്ന് 40.3 കിലോമീറ്റർ ദൂരമുണ്ട്, ടാക്സിയിൽ ഒരു മണിക്കൂറിനുള്ളിൽ എത്താം. ട്രെയിനിലാണ് വരുന്നതെങ്കിൽ തിവിം ആണ് അടുത്തുള്ള സ്റ്റേഷൻ. മഡ്ഗാവിൽ ഇറങ്ങിയാൽ 50 കിലോമീറ്റർ യാത്ര ചെയ്യണം. സ്റ്റേഷനുകളിൽനിന്ന് ബസും ടാക്സിയും എളുപ്പത്തിൽ കിട്ടും. പനാജിയിൽനിന്ന് 15 കിലോമീറ്ററും വാസ്കോഡ ഗാമയിൽനിന്ന് 40 കിലോമീറ്ററുമാണ് റോഡ് മാർഗമുള്ള ദൂരം. അവിടെ കറങ്ങാൻ ഒരു ഇരുചക്ര വാഹനം വാടകയ്ക്ക് എടുക്കുന്നതാണ് ഏറ്റവും നല്ലത്.
കലൻഗുട്ട് സന്ദർശിക്കാൻ പറ്റിയ സമയം
നിങ്ങളുടെ ബജറ്റും പ്ലാനും അനുസരിച്ചാണ് ഏറ്റവും നല്ല സമയം തിരഞ്ഞെടുക്കേണ്ടത്. ഒക്ടോബർ മുതൽ ഫെബ്രുവരി വരെയാണ് പ്രധാന സീസൺ. വാട്ടർ സ്പോർട്സിനും കാഴ്ചകൾ കാണാനും പറ്റിയ തണുപ്പുള്ള കാലാവസ്ഥയായിരിക്കും ഈ സമയത്ത്. ക്രിസ്മസ്, ന്യൂ ഇയർ പാർട്ടികളും ഈ സമയത്താണ്. അതിനാൽ ഹോട്ടലുകൾ നേരത്തെ ബുക്ക് ചെയ്യണം. മാർച്ച് മുതൽ സെപ്റ്റംബർ വരെയുള്ള ഓഫ് സീസൺ ബജറ്റ് യാത്രക്കാർക്ക് പറ്റിയതാണ്. വേനൽക്കാലത്ത് ചൂടും ജൂലൈ-സെപ്റ്റംബർ മാസങ്ങളിൽ കനത്ത മഴയുമായിരിക്കും. പക്ഷേ, ഹോട്ടൽ നിരക്കുകൾ 50% വരെ കുറവായിരിക്കും. ഇൻഡോർ പബ്ബുകളും നൈറ്റ് ലൈഫും ആസ്വദിക്കാൻ ഈ സമയം തിരഞ്ഞെടുക്കാം.
കലൻഗുട്ടിലെ വാട്ടർ സ്പോർട്സ്
കലൻഗുട്ടിനെക്കുറിച്ച് പറയുമ്പോൾ ആവേശകരമായ വാട്ടർ സ്പോർട്സ് ഒഴിവാക്കാനാവില്ല. നിങ്ങളുടെ ആവേശം കൂട്ടാൻ ഇവിടെ ഒരുപാട് ഓപ്ഷനുകളുണ്ട്. ബീച്ചിൻറെ ആകാശക്കാഴ്ച കാണാൻ പാരാസെയ്ലിങ് ചെയ്യാം. കയാക്കിങ്, വിൻഡ്സർഫിങ് എന്നിവയിലൂടെ തിരമാലകളിൽ തെന്നിനീങ്ങാം. അല്ലെങ്കിൽ സ്നോർക്കെലിങ് വഴി കടലിനടിയിലെ ഭംഗി ആസ്വദിക്കാം. വേഗത ഇഷ്ടപ്പെടുന്നവർക്ക് വാട്ടർ സ്കീയിങ്ങും ഉണ്ട്.
ഷോപ്പിങ്ങും ഭക്ഷണവും
ഷോപ്പിങ് ഇഷ്ടപ്പെടുന്നവർക്ക് ഒരു പറുദീസയാണ് കലൻഗുട്ട് മാർക്കറ്റ്. ടൈ-ഡൈ ഡ്രസ്സുകൾ, ഫങ്കി ആഭരണങ്ങൾ, ബൊഹീമിയൻ ബാഗുകൾ, ഡ്രീം ക്യാച്ചറുകൾ തുടങ്ങിയ അടിപൊളി സാധനങ്ങൾ വിലപേശി വാങ്ങാം. ഭക്ഷണത്തിന്റെ കാര്യത്തിൽ, ബീച്ച് ഷാക്കുകളിലെ ഗോവൻ സ്റ്റൈൽ സീഫുഡ് ഒരിക്കലും മിസ് ചെയ്യരുത്. ചെറിയ പാട്ടൊക്കെ കേട്ട് ചെമ്മീനും ആവോലി മീൻ കറിയും ഫിഷ് റൈസും കഴിക്കുന്നത് ഒരു പ്രത്യേക അനുഭവമാണ്.
നൈറ്റ് ലൈഫ്
പകൽ സമയത്ത് ബീച്ച് സജീവമാണെങ്കിലും രാത്രിയാകുമ്പോൾ ഇവിടം ഒരു കളർഫുൾ പാർട്ടി ഹബ്ബായി മാറും. ബീച്ച് ഷാക്കുകളിൽ പാട്ടും നൃത്തവും ലൈറ്റുകളുമായി ആഘോഷം പൊടിപൊടിക്കും. എന്നാൽ നിങ്ങൾക്ക് കുറച്ച് സമാധാനമാണ് വേണ്ടതെങ്കിൽ, അതിനും വഴിയുണ്ട്. ആയുർവേദ മസാജ് സെന്ററുകളും യോഗ ക്ലാസുകളും ലഭ്യമാണ്. കടൽക്കാറ്റേറ്റ് യോഗ ചെയ്യുന്നതും വെയിൽ കായുന്നതുമെല്ലാം മനസ്സിനും ശരീരത്തിനും ഒരുപോലെ ഉന്മേഷം നൽകും.
