ഒരൊറ്റ നാരങ്ങ, 3 മിനിറ്റ്; മൈക്രോവേവ് ക്ലീനാക്കാം, ഇങ്ങനെ ചെയ്താൽ വെട്ടിത്തിളങ്ങും

മൈക്രോവേവ് സ്ഥിരമായി ഉപയോഗിക്കുന്ന ആളാണോ നിങ്ങൾ? തുടർച്ചയായി ഭക്ഷണം ചൂടാക്കുമ്പോൾ കറകളും പാടുകളും വീഴുന്നത് സാധാരണയാണ്. എന്നാൽ ഒരൊറ്റ നാരങ്ങ കൊണ്ട് എളുപ്പത്തിൽ മൈക്രോവേവ് എങ്ങനെ വൃത്തിയാക്കി പുതിയതുപോലെയാക്കാം എന്ന് നോക്കാം.

Image Credit : Getty

നാരങ്ങ കൊണ്ട് മൈക്രോവേവ് തിളങ്ങാനുള്ള വഴി

ഒരു മൈക്രോവേവ് വൃത്തിയാക്കാൻ ഒരു നാരങ്ങ, മൈക്രോസേഫ് ബൗൾ, ഒരു കപ്പ് വെള്ളം, വൃത്തിയുള്ള തുണി അല്ലെങ്കിൽ സ്പോഞ്ച് എന്നിവയെടുക്കുക. ബൗളിൽ വെള്ളമെടുത്ത് നാരങ്ങ രണ്ടായി മുറിച്ച് അതിലിടുക. ഈ ബൗൾ മൈക്രോവേവിൽ വെച്ച് 2-3 മിനിറ്റ് ഉയർന്ന താപനിലയിൽ ചൂടാക്കുക. ശേഷം രണ്ട് മിനിറ്റ് നേരം വാതിൽ തുറക്കരുത്. ഉള്ളിലെ നീരാവി തട്ടി അഴുക്കെല്ലാം ഇളകി വരും. ഇനി ഒരു തുണിയോ സ്പോഞ്ചോ ഉപയോഗിച്ച് മൈക്രോവേവിൻ്റെ ഉൾവശം, ട്രേ, വാതിൽ എന്നിവ തുടച്ചെടുക്കാം. മൈക്രോവേവ് പുതിയതുപോലെ തിളങ്ങും.

Image Credit : Getty

മൈക്രോവേവിലെ കറപിടിച്ച പാടുകൾ നീക്കം ചെയ്യാം

മൈക്രോവേവിലെ കറപിടിച്ച പാടുകൾ കളയാൻ നാരങ്ങ ഉപയോഗിക്കാം. നാരങ്ങയുടെ തൊലിയിൽ അൽപം ഉപ്പോ ബേക്കിംഗ് സോഡയോ പുരട്ടുക. ഈ നാരങ്ങ ഉപയോഗിച്ച് മൈക്രോവേവിൻ്റെ ഉൾവശം, ട്രേ, വാതിൽ എന്നിവ നന്നായി ഉരച്ച് വൃത്തിയാക്കുക. ക്ലീനിംഗിന് ശേഷം, ദുർഗന്ധം പോകാനായി 5 മിനിറ്റ് നേരം മൈക്രോവേവിൻ്റെ വാതിൽ തുറന്നിടുക.

Image Credit : Getty

ലിക്വിഡ് ഡിറ്റർജന്റും നാരങ്ങയും ഉപയോഗിച്ച് വൃത്തിയാക്കാം

മൈക്രോവേവ് വൃത്തിയാക്കാൻ ലിക്വിഡ് ഡിറ്റർജന്റും ഉപയോഗിക്കാം. ഒരു സ്പൂൺ ലിക്വിഡ് ഡിറ്റർജന്റിൽ അൽപം വെള്ളവും നാരങ്ങാനീരും ചേർത്ത് മിക്സ് ചെയ്യുക. ഇനി ഒരു സോഫ്റ്റ് സ്പോഞ്ച് ഉപയോഗിച്ച് മൈക്രോവേവ് തുടച്ചെടുക്കാം. ഇതോടെ മൈക്രോവേവ് പുതിയതുപോലെ തിളങ്ങും.

Image Credit : Getty

നാരങ്ങ, വിനാഗിരി, സോഡ എന്നിവ ഉപയോഗിച്ച് വൃത്തിയാക്കാം

മൈക്രോവേവ് ഒരുപാട് വൃത്തികേടായിട്ടുണ്ടെങ്കിൽ, തുല്യ അളവിൽ നാരങ്ങാനീര്, വിനാഗിരി, ഒരു സ്പൂൺ ബേക്കിംഗ് സോഡ എന്നിവ ചേർത്ത് ഒരു മിശ്രിതം തയ്യാറാക്കുക. ഇത് മൈക്രോവേവിനുള്ളിൽ പുരട്ടി 5 മുതൽ 10 മിനിറ്റ് വരെ വെക്കുക. അഴുക്ക് തനിയെ ഇളകി വരുന്നത് കാണാം. ശേഷം ഒരു തുണി ഉപയോഗിച്ച് എല്ലാം തുടച്ച് വൃത്തിയാക്കാം.