വ്യക്തിഗത വായ്പാ വിഭാഗത്തിൽ ഏറ്റവും വേഗമേറിയ ഈ വളർച്ചയ്ക്ക് പിന്നിൽ സ്വർണ്ണവില വർദ്ധന മാത്രമല്ല, ലളിതമായ വായ്പാ വ്യവസ്ഥകളും, സ്വർണ്ണവായ്പയെ ആശ്രയമായി കാണുന്ന പ്രവണതയുമാണ്.
രാജ്യത്തെ സ്വർണ്ണ വായ്പാ വിപണി അഭൂതപൂർവമായ വളർച്ച രേഖപ്പെടുത്തി മുന്നോട്ട് കുതിക്കുന്നു. സ്വർണ്ണവില റെക്കോർഡ് വർധന രേഖപ്പെടുത്തുന്നതാണ് ഈ കുതിച്ചുചാട്ടത്തിന് പ്രധാന കാരണം. റിസർവ് ബാങ്ക് കണക്കനുസരിച്ച്, 2025 ജൂലൈ 25 വരെ സ്വർണ്ണാഭരണ വായ്പ 2.94 ലക്ഷം കോടി രൂപയായി ഉയർന്നു. മുൻ വർഷം ഇത് 1.32 ലക്ഷം കോടി രൂപയായിരുന്നു. അതായത്, ഒരു വർഷത്തിനിടെ 122 ശതമാനത്തിന്റെ ഞെട്ടിക്കുന്ന വർദ്ധന. വ്യക്തിഗത വായ്പാ വിഭാഗത്തിൽ ഏറ്റവും വേഗമേറിയ ഈ വളർച്ചയ്ക്ക് പിന്നിൽ സ്വർണ്ണവില വർദ്ധന മാത്രമല്ല, ലളിതമായ വായ്പാ വ്യവസ്ഥകളും, സ്വർണ്ണവായ്പയെ ആശ്രയമായി കാണുന്ന പ്രവണതയുമാണ്.
സ്വർണ്ണവില ഉയരുന്നത് എന്തുകൊണ്ട്?
ആഗോള അനിശ്ചിതത്വം: ആഗോളതലത്തിലെ രാഷ്ട്രീയ-സാമ്പത്തിക അസ്ഥിരത നിക്ഷേപകരെ സുരക്ഷിത നിക്ഷേപമെന്ന നിലയിൽ സ്വർണ്ണത്തിലേക്ക് ആകർഷിക്കുന്നു
കേന്ദ്ര ബാങ്കുകളുടെ ഇടപെടൽ: ലോകമെമ്പാടുമുള്ള കേന്ദ്ര ബാങ്കുകൾ സ്വർണ്ണം വാങ്ങിക്കൂട്ടുന്നു
Related Articles
നിക്ഷേപ താൽപ്പര്യം: സാമ്പത്തിക അസ്ഥിരതയുടെ കാലഘട്ടങ്ങളിൽ ആളുകൾ സ്വർണ്ണത്തെ ആകർഷകമായ ഒരു നിക്ഷേപ മാർഗ്ഗമായി കാണുന്ന പ്രവണത വർധിച്ചു.
സ്വർണ്ണ വായ്പയുടെ വർദ്ധിച്ചുവരുന്ന ആവശ്യകതയ്ക്ക് പിന്നിലെ പ്രധാന കാരണങ്ങൾ ഇവയാണ്:
സുരക്ഷിതമല്ലാത്ത വായ്പകളിലെ നിയന്ത്രണം: കോവിഡാനന്തരം വ്യക്തിഗത വായ്പകളും ക്രെഡിറ്റ് കാർഡ് വായ്പകളും പോലുള്ള സുരക്ഷിതമല്ലാത്ത വായ്പകൾ വർദ്ധിച്ചിരുന്നു. ഇതോടെ ആർബിഐ ഇത്തരം വായ്പകളുടെ 'റിസ്ക് വെയ്റ്റ്' ഉയർത്തി. ഇതോടെ സുരക്ഷിതമല്ലാത്ത വായ്പകളുടെ ചെലവ് കൂടുകയും ലഭ്യത കുറയുകയും ചെയ്തു. ഇത് വായ്പ എടുക്കുന്നവരെ സുരക്ഷിതമായ സ്വർണ്ണ വായ്പയിലേക്ക് തിരിയാൻ പ്രേരിപ്പിച്ചു.
ലഭ്യത: മോശം ക്രെഡിറ്റ് ചരിത്രമുള്ളവർക്കും സ്വർണ്ണ വായ്പ എളുപ്പത്തിൽ ലഭിക്കും. ഈടായി സ്വർണം പണയം വയ്ക്കുന്നതിനാലാണിത്.
ധനസമാഹരണം: സ്വർണ്ണ വായ്പ ഒരു 'അവസാന ആശ്രയം' എന്ന കാഴ്ചപ്പാട് മാറി, വിവാഹം, വിദ്യാഭ്യാസം, ബിസിനസ്സ് ആവശ്യങ്ങൾ എന്നിവയ്ക്ക് പണം കണ്ടെത്തുന്നതിനുള്ള സൗകര്യപ്രദവും തന്ത്രപരവുമായ മാർഗമായി ഇത് മാറി ചെറുകിട വ്യാപാരികളും കർഷകരും, പ്രത്യേകിച്ചും ഉത്സവ സീസണുകളിലും മൺസൂൺ കാലത്തും, സ്വർണ്ണ വായ്പയെ കൂടുതലായി ആശ്രയിക്കുന്നു. ചെറുകിട വായ്പകൾക്ക് (2.5 ലക്ഷം രൂപ വരെയുള്ളവ) ആർബിഐ 85 ശതമാനം വരെ 'ലോൺ മാർജിൻ' അനുവദിക്കുന്നു എന്നതും പ്രത്യേകതയാണ്.
വില വ്യതിയാനങ്ങൾ എങ്ങനെ കൈകാര്യം ചെയ്യാം?
വിലയിടിഞ്ഞാൽ, വായ്പ നൽകിയ സ്ഥാപനങ്ങൾ വായ്പ-മൂല്യ അനുപാതം നിലനിർത്താൻ വായ്പയെടുത്തവരോട് ആവശ്യപ്പെടും. ഇതിനായി ഒന്നുകിൽ വായ്പാ തുകയുടെ ഒരു ഭാഗം തിരിച്ചടയ്ക്കാം, അല്ലെങ്കിൽ കൂടുതൽ സ്വർണ്ണാഭരണങ്ങൾ ഈടായി നൽകാം. വായ്പക്കാർക്ക് എസ്.എം.എസ്. അലേർട്ടുകളിലൂടെയും കോളുകളിലൂടെയും വിലയിടിവിനെക്കുറിച്ചും മാർജിൻ ക്രമീകരിക്കേണ്ടതിനെക്കുറിച്ചും മുന്നറിയിപ്പ് ലഭിക്കും. തിരിച്ചടവ് മുടങ്ങുകയാണെങ്കിൽ, 40-60 ദിവസത്തെ ഫോളോ-അപ്പിന് ശേഷം പണയം വെച്ച സ്വർണ്ണം ലേലം ചെയ്യാനുള്ള സാധ്യതയുണ്ട്.
