ബീച്ചുകൾക്കും നൈറ്റ് ലൈഫിനും അപ്പുറം ഗോവയ്ക്ക് സമ്പന്നമായ ഒരു സാംസ്കാരിക പൈതൃകമുണ്ട്. ഹിന്ദു, ക്രിസ്ത്യൻ ആഘോഷങ്ങൾ ഒരുപോലെ കൊണ്ടാടുന്ന ഗോവയിലെ ഉത്സവങ്ങൾ അവിടുത്തെ ജനങ്ങളുടെ കൂട്ടായ്മയുടെയും മതസൗഹാർദ്ദത്തിൻ്റെയും പ്രതീകമാണ്.
ബീച്ചുകളും കടലും മാത്രമല്ല ഗോവ. നമ്മളിൽ പലരും അറിയാത്ത, ആഘോഷങ്ങളുടെയും പാരമ്പര്യങ്ങളുടെയും ഒരു വലിയ ലോകം തന്നെയുണ്ട് ഈ കൊച്ചു സംസ്ഥാനത്തിന്. ഇന്ത്യൻ, പോർച്ചുഗീസ് സംസ്കാരങ്ങൾ ഇടകലർന്ന ഗോവയിലെ ഉത്സവങ്ങൾ ഹിന്ദു-ക്രിസ്ത്യൻ മതവിഭാഗങ്ങൾ ഒരുമിച്ച് ആഘോഷിക്കുന്ന ഒന്നാണ്. ഓരോ ആഘോഷത്തിനും അതിൻ്റേതായ സാംസ്കാരിക പ്രാധാന്യമുണ്ട്. ആളുകളെ ഒന്നിച്ചുചേർക്കുന്ന സന്തോഷത്തിൻ്റെയും ഭക്തിയുടെയും ഈ ആഘോഷങ്ങളെക്കുറിച്ച് കൂടുതലറിയാം.
ഷിഗ്മോ – ഗോവയുടെ വർണാഭമായ വസന്തോത്സവം
ഗോവയിലെ ഏറ്റവും പ്രധാനപ്പെട്ട ഹൈന്ദവ ആഘോഷങ്ങളിൽ ഒന്നാണ് ഷിഗ്മോ. വസന്തകാലത്ത് നടക്കുന്ന ഈ ഉത്സവം നമ്മുടെ ഹോളിക്ക് സമാനമാണ്. തിന്മയുടെ മേൽ നന്മ നേടിയ വിജയമാണ് ഷിഗ്മോയുടെ സന്ദേശം. ഈ സമയത്ത് ഗോവയിലെ ഗ്രാമങ്ങൾ നാടൻ നൃത്തങ്ങൾ, പുരാണകഥകളെ അടിസ്ഥാനമാക്കിയുള്ള പ്രകടനങ്ങൾ തുടങ്ങിയവയാൽ സജീവമാകും. പരമ്പരാഗത വസ്ത്രങ്ങൾ ധരിച്ച് ആളുകൾ 'ധാലോ', 'ഘോഡെ മോഡ്നി' തുടങ്ങിയ നൃത്തങ്ങൾ അവതരിപ്പിക്കും. ഗോവൻ പൈതൃകത്തിൻ്റെ ഒരു നേർക്കാഴ്ച തന്നെയാണ് ഷിഗ്മോ.
ക്രിസ്മസ് – ഗോവയിലെ ഗംഭീര ആഘോഷം
പോർച്ചുഗീസ് പാരമ്പര്യത്തിൻ്റെ സ്വാധീനം ഏറ്റവുമധികം കാണാൻ കഴിയുന്ന ആഘോഷമാണ് ഗോവയിലെ ക്രിസ്മസ്. സംസ്ഥാനത്തുടനീളം വലിയ ആവേശത്തോടെയാണ് ക്രിസ്മസ് കൊണ്ടാടുന്നത്. പള്ളികൾ മനോഹരമായി അലങ്കരിക്കും, ആയിരക്കണക്കിന് ആളുകൾ പാതിരാ കുർബാനയിൽ പങ്കെടുക്കും, വീടുകൾ നക്ഷത്രവിളക്കുകളും ക്രിസ്മസ് ട്രീകളും കൊണ്ട് നിറയും. കരോൾ ഗാനങ്ങളും കുടുംബങ്ങൾ ഒന്നിച്ചുള്ള വിരുന്നുകളും ഈ സമയത്തെ കൂടുതൽ സന്തോഷകരമാക്കുന്നു.
Related Articles
സാവോ ജാവോ – വ്യത്യസ്തമായ ജലോത്സവം
ഗോവയിൽ മാത്രം കാണുന്ന ഒരു പ്രത്യേക ആഘോഷമാണ് സാവോ ജാവോ. പ്രധാനമായും വടക്കൻ ഗോവയിലെ ക്രിസ്ത്യൻ സമൂഹമാണ് ഇത് ആഘോഷിക്കുന്നത്. ജൂൺ മാസത്തിൽ നടക്കുന്ന ഈ ഉത്സവം സ്നാപക യോഹന്നാനോടുള്ള ആദരസൂചകമായാണ് നടത്തുന്നത്. പൂക്കൾ കൊണ്ടുള്ള കിരീടം തലയിൽ ചൂടി ചെറുപ്പക്കാർ പുഴകളിലേക്കും കുളങ്ങളിലേക്കും എടുത്തുചാടും. മഴയെയും ഫലഭൂയിഷ്ഠതയെയും പ്രകൃതിയെയും വരവേൽക്കുന്ന ഒരു ആഘോഷമാണിത്.
ആഘോഷങ്ങളിലൂടെ സാംസ്കാരിക ഒരുമ
ഗോവയിലെ ഉത്സവങ്ങൾ നാനാത്വത്തിൽ ഏകത്വം എന്ന ആശയത്തെയാണ് പ്രതിഫലിപ്പിക്കുന്നത്. ഇവിടെ വ്യത്യസ്ത മതവിഭാഗങ്ങളിൽപ്പെട്ട ആളുകൾ പരസ്പരം ആഘോഷങ്ങളിൽ പങ്കുചേരുന്നു. അത് ഹൈന്ദവരുടെ ഘോഷയാത്രകളായാലും ക്രിസ്ത്യാനികളുടെ തിരുനാളുകളായാലും, ഈ ആഘോഷങ്ങൾ സാമൂഹ്യ ബന്ധങ്ങൾ കൂടുതൽ ശക്തമാക്കുന്നു. ഗോവയുടെ സാംസ്കാരിക തനിമ നിലനിർത്തുന്നതിലും ഈ ഉത്സവങ്ങൾക്ക് വലിയ പങ്കുണ്ട്.
