അമേരിക്കയിലെ ബാൾട്ടിമോറിൽ ഫുഡ് ട്രക്ക് നടത്തുന്ന സമൂഹ മാധ്യമ താരം മുഹ്സിൻ സറാക്കിന്റെ കടയിൽ നിന്ന് പണം മോഷ്ടിച്ച യുവാവിന്റെ അമ്മ നേരിട്ടെത്തി പണം തിരികെ നൽകി. മകന്റെ തെറ്റിന് ക്ഷമ ചോദിച്ച അമ്മയുടെ പ്രവൃത്തിയുടെ വീഡിയോ സൈബർ ലോകത്ത് വൈറലായിരിക്കുകയാണ്. ഈ സംഭവം മാനവികതയുടെയും സത്യസന്ധതയുടെയും ഉത്തമ ഉദാഹരണമായി പ്രശംസിക്കപ്പെടുന്നു.
അമേരിക്കയിലെ ബാൾട്ടിമോറിൽ ഫുഡ് ട്രക്ക് നടത്തുന്ന പ്രശസ്ത സമൂഹ മാധ്യമ താരം മുഹ്സിൻ സറാക്കിന് (Musa_usa) ഉണ്ടായ അവിശ്വസനീയമായ അനുഭവം സൈബർ ലോകത്ത് ചർച്ചയാകുന്നു. തന്റെ ഭക്ഷണശാലയിൽ നിന്നും പണം മോഷ്ടിച്ച യുവാവിന്റെ അമ്മ നേരിട്ടെത്തി മോഷണം പോയ തുക തിരികെ നൽകിയതാണ് ഏവരെയും അമ്പരപ്പിച്ചത്.
പണം മോഷ്ടിച്ചോടിയ യുവാവ്
തുർക്കി വംശജനായ മുഹ്സിൻ സറാക്ക് ബാൾട്ടിമോറിലെ ഇംഗ്ലീസൈഡ് അവന്യൂവിൽ 'മൂസ സ്റ്റീക്ക് ആൻഡ് ഡോഗ്സ്' എന്ന ഫുഡ് ട്രക്ക് നടത്തിവരികയാണ്. കഴിഞ്ഞ മാർച്ച് 28 -ന് അദ്ദേഹം തന്റെ ബിസിനസ്സ് ലൈവ് സ്ട്രീം ചെയ്യുന്നതിനിടെ ഒരാൾ കൗണ്ടറിലിരുന്ന ടിപ്പ് ജാറിൽ നിന്ന് പണം തട്ടിയെടുത്ത് ഓടുകയായിരുന്നു. ഈ ദൃശ്യങ്ങൾ ക്യാമറയിൽ പതിഞ്ഞിരുന്നു. സംഭവം നടന്ന് ഏതാനും ദിവസങ്ങൾക്ക് ശേഷം ഒരു സ്ത്രീ സറാക്കിന്റെ അടുത്തേക്ക് എത്തി.
Related Articles
താൻ പണം മോഷ്ടിച്ച യുവാവിന്റെ അമ്മയാണെന്ന് അവർ സ്വയം പരിചയപ്പെടുത്തിയപ്പോൾ സറാക്ക് അക്ഷരാർത്ഥത്തിൽ ഞെട്ടിപ്പോയി. മകൻ എത്ര രൂപയാണ് മോഷ്ടിച്ചതെന്ന് അവർ നേരിട്ട് ചോദിച്ചു. 30 ഡോളറോളം (ഏകദേശം 2,500 രൂപ) വരുമെന്ന് സറാക്ക് മറുപടി നൽകി. സറാക്കിന്റെ എതിർപ്പുകൾ അവഗണിച്ച് കൊണ്ട് ആ തുക അവർ ടിപ്പ് ജാറിൽ നിക്ഷേപിച്ചു. തന്റെ മകൻ മോശം വ്യക്തിയല്ലെന്നും എന്നാൽ, മദ്യലഹരിയിൽ അവൻ എടുത്ത തെറ്റായ തീരുമാനമായിരുന്നു അതെന്നും ആ അമ്മ വികാരാധീനയായി പറഞ്ഞു. ഒരാളുടെ പണം മോഷ്ടിക്കാൻ പഠിപ്പിച്ചല്ല താൻ മകനെ വളർത്തിയതെന്ന് പറഞ്ഞ അവർ, സറാക്കിനോട് ക്ഷമ ചോദിച്ചു.
അവനെ ഞാൻ അങ്ങനെയല്ല വളർത്തിയത്
മുഹ്സിൻ സറാക്ക് തന്നെ ഇൻസ്റ്റാഗ്രാമിലും യൂട്യൂബിലും പങ്കുവെച്ച ഈ വീഡിയോ നിമിഷങ്ങൾക്കകം വൈറലായി. "നിങ്ങളുടെ പണം മോഷ്ടിക്കപ്പെടാൻ പാടില്ലാത്തതാണ്, അതുകൊണ്ട് എനിക്ക് ഇത് തിരികെ നൽകണം," എന്ന് ആ അമ്മ പറയുന്ന ഭാഗം പ്രേക്ഷകരുടെ മനസ്സ് കീഴടക്കി. വീഡിയോയുടെ അവസാനം വികാരാധീനനായ സറാക്ക് ആ അമ്മയെ കെട്ടിപ്പിടിക്കുന്നതും കാണാം.
"ലോകത്ത് മാനവികത ഇനിയും നശിച്ചിട്ടില്ല എന്നതിന്റെ തെളിവാണിത്" എന്നാണ് വീഡിയോയ്ക്ക് താഴെ വന്ന ഒരു കമന്റ്. മകന്റെ തെറ്റ് തിരുത്താൻ കാണിച്ച ആ അമ്മയുടെ സത്യസന്ധതയെയും ആർജ്ജവത്തെയും സമൂഹ മാധ്യമ ഉപയോക്താക്കൾ ഒന്നടങ്കം പ്രകീർത്തിക്കുകയാണ്. നിലവിൽ ഇൻസ്റ്റാഗ്രാമിലും യൂട്യൂബിലുമായി ലക്ഷക്കണക്കിന് ഫോളോവേഴ്സുള്ള സറാക്ക്, തന്റെ ഫുഡ് ട്രക്ക് വിശേഷങ്ങളും ഗെയിമിംഗ് വീഡിയോകളും സ്ഥിരമായി പങ്കുവെക്കാറുണ്ട്.
