അമ്മച്ചിയെ ദുബായില്‍ കൊണ്ടുവരുമ്പോള്‍..!

ദേശാന്തരത്തില്‍ ലിസ് ജോസഫ് 

അനുഭവങ്ങളുടെ ഖനിയാണ് പ്രവാസം. മറ്റൊരു ദേശം. അപരിചിതരായ മനുഷ്യര്‍. പല ദേശക്കാര്‍. പല ഭാഷകള്‍. കടലിനിപ്പുറം വിട്ടു പോവുന്ന സ്വന്തം നാടിനെക്കുറിച്ചുള്ള ഓര്‍മ്മകള്‍ കൂടി ചേരുമ്പോള്‍ അത് അനുഭവങ്ങളുടെ കോക് ടെയിലായി മാറുന്നു. പ്രിയ പ്രവാസി സുഹൃത്തേ, നിങ്ങള്‍ക്കുമില്ലേ, അത്തരം അനേകം ഓര്‍മ്മകള്‍. അവയില്‍ മറക്കാനാവാത്ത ഒന്നിനെ കുറിച്ച് ഞങ്ങള്‍ക്ക് എഴുതാമോ? പ്രവാസത്തിന്റെ ദിനസരിക്കുറിപ്പുകളിലെ നിങ്ങളുടെ അധ്യായങ്ങള്‍ക്കായി ഇതാ ഏഷ്യാനെറ്റ് ന്യൂസ് ഒരുക്കുന്ന പ്രത്യേക ഇടം, ദേശാന്തരം. ഫോട്ടോയും പൂര്‍ണ്ണ വിലാസവും കുറിപ്പും webteam@asianetnews.in എന്ന വിലാസത്തില്‍ അയക്കാം.. ദേശാന്തരം എന്ന് സബ് ജക്റ്റ് ലൈനില്‍ എഴുതാന്‍ മറക്കരുത്

'ഇത്രയും വലിയ വിമാനം എങ്ങനാ, ഈ ആകാശത്തു ഒരു പിടിത്തവുമില്ലാതെ താഴെ വീഴാതെ ഇങ്ങിനെ പറക്കുക'? വിമാനം ആകാശത്തു കാണുമ്പോള്‍ അമ്മച്ചിയുടെ ഉത്കണ്ഠയും പേടിയും കലര്‍ന്ന ചോദ്യം എന്നോട്. .

വിമാനത്തില്‍ കയറാനുള്ള അമ്മച്ചിയുടെ ഈ പേടികൊണ്ടു തന്നെ, പഠിച്ച പണി പതിനെട്ടും നോക്കിയിട്ടും എന്റെ അമ്മച്ചിയെ വിമാനത്തില്‍ കയറ്റിക്കൊണ്ടു വന്നു, ദുബായ് കറക്കുക എന്നത് എന്റെ ജീവിതത്തിലെ നടക്കാത്ത സ്വപ്നമായി ഇന്നും അവശേഷിക്കുന്നു.

വേറൊന്നിനുമല്ല! നമ്മുടെ നാട് മാത്രം കണ്ടിട്ടുള്ള അമ്മച്ചിയെ-കൊച്ചിയില്‍ കൂടി എപ്പോഴെങ്കിലും യാത്ര ചെയ്യുമ്പോള്‍, വളരെ അപൂര്‍വ്വമായെങ്കിലും കാണാറുള്ള കുട്ടിയുടുപ്പുമിട്ടു നടക്കുന്ന ഏതേലും മദാമ്മയേയോ, അല്ല ഏതെങ്കിലും തടിച്ചുവീര്‍ത്ത സ്ത്രീകളോ പുരുഷന്മാരോ അവര്‍ക്കു ചേരാത്ത വേഷവിധാനത്തില്‍ പോവുന്നത് കണ്ടാലോ, ചമ്മലോടെ തലവെട്ടിച്ചു, ചിരി നിയന്ത്രിക്കാന്‍ പാടുപെടുമായിരുന്ന അമ്മച്ചിയെ കൊണ്ടുവന്നു ഇവിടുത്തെ, അംബരചുംബികളായ കെട്ടിടങ്ങളിലും, ദുബായ് മാളിലും ദേരസിറ്റി സെന്ററിലുമൊക്കെ കറക്കി '3 വയസ്സുള്ള കുട്ടിയും 33 വയസ്സുള്ള കുട്ടിയുടെ അമ്മയും, 63 വയസുള്ള കുട്ടിയുടെ അച്ഛനുമൊക്കെ' ഫാഷന്‍ എന്ന പേരും പറഞ്ഞു, മുട്ടോളം എത്താത്ത കീറിപ്പറിഞ്ഞ ട്രൗസറും, നമ്മുടെ നാട്ടില്‍ പാടത്തു പണിക്കുപോവുമ്പോള്‍ ഇടുന്ന മാതിരിയുള്ള കയ്യില്ലാത്ത ഒരു ബനിയനുമിട്ട്, കുട്ടിക്കളികള്‍ കളിച്ചു നടക്കുന്നത് കാണിക്കാനും,'ബര്‍ഗര്‍കിങ് മാക് ഡൊണാള്‍ഡ്‌സ്, തുടങ്ങിയ കടകളുടെ മുന്നില്‍, 'തടിച്ചുവീര്‍ത്ത ഒരു വലിയ ബര്‍ഗറിന്റെ' രൂപത്തില്‍ ഇരുന്നു, ഇനിയും കുറെ കൂടി വീര്‍ക്കാനുണ്ടെന്ന ഭാവേന, വീണ്ടും ഫാസ്റ്റ് ഫുഡ് തട്ടി വിടുന്ന വിദേശികളെയും സ്വദേശികളെയുമൊക്കെ കാണിച്ചു- ഇതെല്ലാം കാണുമ്പോഴുള്ള അമ്മച്ചിയുടെ ചമ്മലില്‍ കലര്‍ന്ന പൊട്ടിച്ചിരി കാണാനുള്ള ഭാഗ്യം എനിക്കുണ്ടായില്ല . അമ്മച്ചിക്ക് പ്രായാധിക്യമായതിനാല്‍ ഇനി കൊണ്ടു വരിക എന്നത് അസാധ്യവും.

അങ്ങനെയിരിക്കെ, കുടുംബ സുഹൃത്തിന്റെ വീട്ടില്‍, പുള്ളിക്കാരന്റെ 70 - 74 വയസുള്ള അമ്മച്ചിയെ അവര്‍ കറക്കാന്‍ കൊണ്ടുവന്നുവെന്നറിഞ്ഞു ഒന്നു കാണാമെന്നു കരുതി ഞാന്‍ ഒരു സന്ദര്‍ശനം നടത്തി.

മകനും മകളും, അമ്മച്ചിയെത്തി എന്നു പറയുമ്പോഴുള്ള സന്തോഷമൊന്നും, അമ്മച്ചിക്ക് കാണുന്നില്ല. 

'അമ്മച്ചിക്ക് ഇവിടെയൊക്കെ ഇഷ്ടപ്പെട്ടോ?'- ഞാന്‍ ചോദിച്ചു.

'എന്റെ മോളെ, ഇവിടെങ്ങും മനുഷ്യരൊന്നുമില്ലേ? മൂന്നാലു മനുഷ്യരെ കാണാതെ എങ്ങനാ ഇങ്ങിനെ അടച്ച മുറികളില്‍ ഇരിക്കാനാണ്?- അമ്മച്ചി.

പാവം അമ്മച്ചി! നാട്ടിലെ വീട്ടില്‍ രാവിലെ എഴുനേറ്റു, പാല്‍ക്കാരനെയും പത്രക്കാരനെയുമൊക്കെ നോക്കി നിന്നു, തൊടിയിലിറങ്ങി,ചെടികളും പൂക്കളുമൊക്കെ കണ്ടു, അതിലെ കടന്നുപോവുന്ന പരിചയക്കാരോടൊക്കെ കൊച്ചു വര്‍ത്തമാനം പറഞ്ഞു നടക്കുമ്പോഴുള്ള സന്തോഷമൊന്നും മുഖത്തില്ല.

രാവിലെ എഴുന്നേറ്റു പല്ലുതേച്ചു, ചായയും കുടിച്ചു ടി വിക്കുമുന്നില്‍ വന്നിരുന്നു ഉറക്കം തൂങ്ങല്‍ തന്നെ, ദിനചര്യ.

മകനും മരുമകളും 8 മണിയോടെ ജോലിക്കു പോകും. അവര്‍ തിരിച്ചു വരുന്നതുവരെ അടച്ചിട്ട ഫ്‌ളാറ്റിനുള്ളില്‍ ഉറക്കവും തൂക്കവുമായി ഏകാന്തതയില്‍, നാട്ടില്‍ തിരിച്ചു പോവാനുള്ള ദിവസമെണ്ണി കാത്തിരിക്കുന്നു.

ഇടക്ക് ഏതെങ്കിലും മനുഷ്യരുടെ മുഖം കാണാനോ ആരോടെങ്കിലും ഒന്നു സംസാരിക്കാനോ കൊതിയോടെ ബാല്‍ക്കണിയില്‍ ഇറങ്ങി നോക്കും. ഒരാളെപ്പോലും കാണാനില്ലാതെ പൊരിഞ്ഞ ചൂട് സഹിക്കാനാവാതെ വീണ്ടും അകത്തു കയറി സോഫയില്‍ ചാഞ്ഞിരുന്നു ഉറക്കം തന്നെ.

വൈകിട്ടു മകനും മരുമകളും എത്തിയാല്‍ ഉടന്‍ അമ്മച്ചിയേയും കൊണ്ടു ഏതേലും ഷോപ്പിംഗ് മാളിലേക്ക് പോവാനിറങ്ങി കാറിലേക്ക് നടക്കുമ്പോഴും, അമ്മച്ചിക്ക് ഒരേ ചോദ്യം, 'ശോ, ഇവിടെങ്ങും ഒരു മനുഷ്യന്‍ പോലുമില്ലെടാ, എന്തൊരു ജീവിതം?'

ഷോപ്പിംഗ് മാളില്‍ എത്തിയാലോ? പരിചയമില്ലാത്ത കുറെ ആള്‍ക്കാര്‍! പല രാജ്യക്കാര്‍, പല ഭാഷക്കാര്‍! അവരോടു എന്തു സംസാരിക്കാന്‍. അവരവരുടെ ട്രോളികളില്‍ കുറെ സാധങ്ങളും നിറച്ച് വീണ്ടും ഏകാന്തതയുടെ കോണ്‍ക്രീറ്റ് സൗധങ്ങളിലേക്ക് പായുന്ന മനുഷ്യര്‍!

തിരിച്ചു വന്നു വീണ്ടും ഫ്ളാറ്റിലേക്ക് കയറുമ്പോഴും അമ്മച്ചിയുടെ അതേ ചോദ്യം, 'ഹോ, ഒന്നു മനുഷ്യരെ കാണാനും മിണ്ടാനും പറയാനും കൊതിച്ചു പുറത്ത് പോയതാണ്. ഇവിടെങ്ങും മനുഷ്യരൊന്നുമില്ലെടാ, നമ്മുടെ നാട്ടിലെ പോലെ?'

സത്യമാണമ്മച്ചി ആറു വര്‍ഷത്തിലേറെയായി ദുബായിയില്‍ ഞാന്‍ താമസിക്കുന്ന ഫ്‌ളാറ്റിന്റെ അടുത്ത ഫ്ളാറ്റുകളുടെയുള്ളില്‍ മനുഷ്യവാസം ഉണ്ടോയെന്നു, ഇന്നും എനിക്കറിയില്ല.

താഴെ റിസപ്ഷനില്‍ ഇരിക്കുന്ന സെക്യൂരിറ്റി ഫ്‌ളാറ്റില്‍ ഒഴിവുണ്ടോ എന്നു അന്വേഷിച്ചു വരുന്നവരോട്, എല്ലാം ഫുള്‍ ആണെന്ന് പറയുന്നത് കേള്‍ക്കുമ്പോള്‍, ഞാനും മനസില്‍ ചോദിച്ചു തുടങ്ങി, 'ഇവിടെങ്ങും മനുഷ്യര്‍ ഇല്ലെടാ'?

ഇനി അഥവാ ഉണ്ടെങ്കില്‍ തന്നെ, ഏതു നാട്ടുകാര്‍ ആണെന്നുപോലും അറിയാതെ, സദാ സമയവും അടഞ്ഞുകിടക്കുന്ന ആ വാതിലുകളില്‍ മുട്ടി വിളിച്ചു, അവരോടു കുശലം ചോദിക്കാന്‍ ചെല്ലാനുള്ള ധൈര്യവും എനിക്കില്ല. 

കാരണം എല്ലാ ആള്‍ക്കാരും, നമ്മളെപോലെ മനുഷ്യരുടെ സംസര്‍ഗം ഇഷ്ടപ്പെടണമെന്നില്ലല്ലോ?

ദേശാന്തരം ഇതുവരെ
കണിക്കൊന്നക്ക് പകരം ഡാഫോഡില്‍ പൂക്കള്‍; ഇത് ഞങ്ങളുടെ വിഷു!

അത്തറിന്റെ മണമുള്ള പുരാതന ഹജ്ജ് പാത

ജസ്റ്റിന്‍ ബീബറിന്റെ നാട്ടിലെ ഷേക്‌സ്പിയര്‍ അരയന്നങ്ങള്‍

കാനഡയിലെ കാട്ടുതീയില്‍നിന്ന് നാം പഠിക്കേണ്ട പാഠങ്ങള്‍

പ്രവാസികളുടെ കണ്ണുകള്‍ നിറയുന്ന ആ നേരം!

മുറിയില്‍ ഞാനുറങ്ങിക്കിടക്കുമ്പോള്‍ റോഡില്‍ അവര്‍ മരണത്തോടു മല്ലിടുകയായിരുന്നു

ഈ വീട്ടില്‍ 100 പേര്‍ താമസിച്ചിരുന്നു!

അമേരിക്കയിലെ നാരദന്‍!

ദുബായിലെവിടെയോ അയാള്‍ ഉണ്ടാവണം, ഒറ്റ യാത്രകൊണ്ട് എന്നെ കരയിച്ച ആ മനുഷ്യന്‍!

കോര്‍ണിഷിലെ ആ പാക്കിസ്താനിയുടെ കണ്ണില്‍ അപ്പോഴെന്ത് ഭാവമായിരിക്കും?

രമേശന്‍ എന്തിനായിരുന്നു എല്ലാം ഉപേക്ഷിച്ച് ഹിജഡകള്‍ക്കൊപ്പം പോയത്?

ബാച്ചിലര്‍ റൂമിലെ അച്ചാര്‍ ചായ!

ദുബായിലൊരു കലന്തര്‍ ഹാജി!

ഒരൊറ്റ മഴയോര്‍മ്മ മതി; പ്രവാസിക്ക് സ്വന്തം നാടുതൊടാന്‍!

ജിദ്ദയിലേക്കുള്ള കാറില്‍ ആ ബംഗാളിക്ക് സംഭവിച്ചത്

മരണമെത്തുന്ന നേരത്ത്...

ലോഹഗഡില്‍ പെരുമഴയത്ത് മൂന്ന് പെണ്ണുങ്ങള്‍!

വിപ്ലവകാരിയായി മാറിയ എനിക്ക് അര്‍ബാബ് നല്‍കിയ മറുപടി!

ദീഐന്‍: സൗദി മലമുകളിലെ അത്ഭുത ഗ്രാമം

ആ തള്ളായിരുന്നു ഞങ്ങളുടെ പ്രമോഷന്‍ ടെസ്റ്റ്!

അര്‍ദ്ധരാത്രി നാട്ടില്‍നിന്നൊരു കോള്‍!

മറിയം, എന്റെ വലിയ പൂമ്പാറ്റ!

മരിയയെ ചതിച്ചത് ഒരു മലയാളിയാണ്!

ആകാശത്തിനും ഭൂമിയ്ക്കുമിടയിലെ അരവയര്‍ ജീവിതം

അമേരിക്കയിലെ മഞ്ഞുകാലം

ഭയന്നുവിറച്ച് ഒരു സൗദി കാര്‍ യാത്ര!

ആ ഹെലികോപ്റ്റര്‍ വീട്ടിലെത്തുമ്പോള്‍ അവര്‍ ജീവിച്ചിരിപ്പുണ്ടാവുമോ?

റിയാദിലെ ആ മലയാളി ഞങ്ങളെ ചതിക്കുകയായിരുന്നു!

 ബത്ഹ: മരുഭൂമിയിലെ കോഴിക്കോട്ടങ്ങാടി​

ഖത്തര്‍ പൊലീസ് ഡാ!​

അമ്മദ്ക്ക കണ്ട കോര്‍ണിഷ്!